Wikipedia:Cudeschs

Introducziun Tar in cudesch da Vichipedia sa tracti d’ina collecziun d’artitgels da Vichipedia ch’èn colliads tematicamain in cun l’auter. L’avantatg dal cudesch da Vichipedia: la collecziun d’artitgels sa lascha transfurmar ed editar en divers formats electronics (PDF, ZIM, OpenDocument); quests formats èn adattads per duvrar ils artitgels al computer/tablet (sco e-book) u era per als stampar. Ultra da quai èsi pussaivel d’empustar il cudesch cun paucs clics sur PediaPress sco Book-on-demand. Ils cudeschs en il format DIN-A5 vegnan furnids – tut tenor giavisch – cun maletgs en nair/alv u en colur, cun cuverta loma u dira.

Exempels per cudeschs da Vichipedia stampads

Ediziuns da texts

Litteratura

L’um ch’ha pers sia sumbriva

L’um ch’ha pers sia sumbriva L’istorgia mirvegliusa da Peter Schlemihl «Per ils Franzos sun jau memia tudestg e per ils Tudestgs memia franzos, per ils catolics protestant e per ils protestants catolic, ils aristocrats ma tractan da giacubin ed ils democrats da nobel... Nagliur sun jau da chasa, dapertut vegn jau resguardà sco l’ester.» Cun ‹Peter Schlemihl› ha Adelbert von Chamisso, l’‹autur senza patria›, scrit in dals pli bels raquints da la romantica insumma.  » Dapli infurmaziuns

Istorgia

Davart l’erupziun dal Vesuv l’onn 79 s.C.

Davart l’erupziun dal Vesuv l’onn 79 s.C. Dal testimoni istoric a la rescuverta da Pompei L’onn 79 s.C. ha gì lieu in’erupziun dal Vesuv ch’ha chaschunà in grond dumber da victimas e sepulì cumplettamain las citads da Pompei e Herculaneum. Plinius il Giuven ha descrit pli tard quest eveniment en duas brevs. Questas funtaunas scrittas sco er las exchavaziuns dal temp modern porschan in’invista profunda en la vita da mintgadi dal temp dals imperaturs.  » Dapli infurmaziuns

Filosofia

Tge è l’illuminissem?

Resposta a la dumonda: Tge è l’illuminissem? Ediziun e commentari En la vegliadetgna da 60 onns ha il filosof Immanuel Kant publitgà l’onn 1784 ses tractat ‹Resposta a la dumonda: Tge è l’illuminissem?›, il qual dueva daventar in dals texts-clav da l’epoca. Il text è a medem temp in confess persunal, in’analisa da la situaziun sociala e politica a la fin dal 18avel tschientaner sco er in appel als docts e regents da cuntinuar sin la via enchaminada.  » Dapli infurmaziuns

Cudeschs tematics

Religiun

Las religiuns mundialas

Las religiuns mundialas Giudaissem, cristianissem ed islam – hinduissem e budissem En il center da questa publicaziun stattan ils purtrets da las tschintg religiuns che vegnan consideradas en il senn classic sco ‹mundialas›. Da quellas fan part las trais religiuns da caracter monoteistic-abrahamistic (giudaissem, cristianissem ed islam) sco er las duas religiuns – per part bundant pli veglias – che derivan oriundamain dal Subcontinent Indic (hinduissem e budissem).  » Dapli infurmaziuns

Istorgia

Emprima Guerra mundiala

Emprima Guerra mundiala La catastrofa originara dal 20avel tschientaner L’Emprima Guerra mundiala (1914–1918) ha furmà l’emprim conflict militar insumma ch’è vegnì manà cun meds materials massivs e cun armas da destrucziun en massa. Sin ils champs da battaglia èn morts milliuns schuldads senza che la situaziun militara fiss sa midada a moda decisiva. Perquai e pervi da sias consequenzas vala questa guerra sco «catastrofa originara dal 20avel tschientaner».  » Dapli infurmaziuns

Musica

Classica viennaisa

Classica viennaisa Il temp da Haydn, Mozart e Beethoven Sco ‹classica viennaisa› vegnan designads ils radund 50 onns tranter il 1780 ed il 1830 che duevan furmar sco nagin’autra epoca la chapientscha da la musica d’auta cultura europeica. En il center da la classica – situada tranter baroc e romantica – stat l’ovra dals trais cumponists Joseph Haydn (1732–1809), Wolfgang Amadeus Mozart (1756–1791) e Ludwig van Beethoven (1770–1827).  » Dapli infurmaziuns

Retschas

Purtrets dals stadis europeics

Europa dal Nord

Europa dal Nord Purtrets dals stadis europeics 1 L’Europa dal Nord è enconuschenta sco destinaziun turistica segnada d’ina natira intacta e da cuntradas infinitas. Ed ils pajais da l’Europa dal Nord tutgan tar ils pli sviluppads insumma e valan sco exemplarics sin il sectur da l’assistenza sociala. Quests aspects e blers auters vegnan preschentads en quest cudesch en furma d’artitgels da survista sco er en purtrets dals singuls stadis.  » Dapli infurmaziuns

Europa dal Sid

Europa dal Sid Purtrets dals stadis europeics 3 Questa publicaziun purtretescha il Portugal, la Spagna, l’Italia, il stadi insular Malta ed ils stadis pitschens Andorra, Monaco, San Marino e Vatican. La regiun è segnada da l’ierta da l’Imperi roman occidental, da la cultura cristiana da tempra catolic-romana e da la Mar Mediterrana. Quest’ultima, che collia trais continents, vegn preschentada en in focus tematic a la fin dal cudesch.  » Dapli infurmaziuns

Epocas da l’istorgia mundiala

Illuminissem e revoluziuns

Illuminissem e revoluziuns Epocas da l’istorgia mundiala 5 Il tschientaner tranter il 1750 ed il 1850 vala sco ‹temp da sava› (Reinhart Koselleck); quel ha mess ad ir midaments fundamentals ch’han tschiffà praticamain tut ils champs dal pensar ed agir da l’uman. Il tom ‹Illuminissem e revoluziuns› focussescha sin dus da quels, numnadamain sin ils svilups spiertals e politics. En il center stattan ils eveniments en l’Europa ed en l’America dal Nord.  » Dapli infurmaziuns