Utilisader:D.Camenisch/Cudeschs/Brasilia/Introducziun
La Brasilia cumpiglia bunamain la mesadad da la surfatscha da l'America dal Sid. La cuntrada è segnada en il nord dals vasts guauds tropics dal batschigl da l'Amazonas ed en il sid d'autas planiras, collinas e muntognas.
La populaziun brasiliana sa cumpona da quatter gruppas principalas: ils Portugais sco colonisaturs oriunds, ils Africans ch'èn vegnids manads sco sclavs en il pajais, ulteriurs immigrants da l'Europa e da l'Asia ch'èn arrivads dapi il 19avel tschientaner en la Brasilia sco er diversas gruppas etnicas autoctonas. En il fratemp èn quest pievels però sa maschadadas en tala moda ch'in'attribuziun clera n'è savens betg pussaivla.
Rio de Janeiro ha furmà bunamain 200 onns la chapitala dal pajais, fin che la nova citad Brasília ha occupà il 1960 questa posiziun. Tuttina è Rio de Janeiro restà la pli enconuschenta citad dal pajais; turists l'apprezieschan pervi dal carnaval e las splagias che tutgan tar las pli bellas en tut il mund.
Questa publicaziun sa cumpona da l'artitgel da survista ‹Brasilia› e vegn cumplettada a la fin d'intginas chartas geograficas. La part principala porscha infurmaziuns detagliadas davart ils suandants temas:
- Geografia
- Populaziun
- Linguas
- Fatgs socials
- Num
- Istorgia
- Politica
- Economia
- Situaziun actuala
- Infrastructura
- Cultura
La versiun preschenta dal cudesch è vegnida preparada per la stampa il zercladur 2021. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.