Utilisader:D.Camenisch/Cudeschs/Catalugna – Barcelona/Introducziun
La Catalugna cun sia chapitala Barcelona furma en il nordost da la Spagna, al cunfin vers la Frantscha, ina regiun da vacanzas e da cultura ordvart tschertgada. Sper la natira da la retroterra e las splagias da la Costa Brava attiran diversas attracziuns architectonicas ils turists – ed il FC Barcelona ils fans da ballape.
La Catalugna è vegnida industrialisada baud e furma la pli ferma regiun economica da l'entira Spagna. Pervia da quai, ma er per motivs istorics, enconuscha la Catalugna in ferm moviment d'independenza che maina adina puspè a tensiuns politicas tranter Barcelona e Madrid.
Questa publicaziun cumpiglia l'artitgel da survista ‹Catalugna›, purtretescha la chapitala Barcelona e vegn cumplettada a la fin d'intginas chartas geograficas. L'artitgel principal porscha infurmaziuns detagliadas davart ils suandants temas:
- Geografia
- Sutdivisiun politica
- Clima
- Istorgia
- Sistem politic e moviment d'independenza
- Economia
- Linguas
- Cultura
La versiun preschenta dal cudesch è vegnida preparada per la stampa il favrer 2021. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.