Utilisader:D.Camenisch/Cudeschs/En il cor da la stgirezza/Introducziun
Il raquint ‹Heart of Darkness› è cumparì oriundamain a Londra en il ‹Blackwood's Magazine› (en trais parts en ils numers dal favrer fin l'avrigl 1899). I sa tracta d'in raquint en in raquint, en il qual Charlie Marlow expona davant ina gruppa dad umens sin ina nav che ruaussa davant Londra in'aventura succedida pli baud en sia vita. Schebain ch'il lieu na vegn betg numnà explicitamain, sa lascha enconuscher ch'il viadi aveva manà da ses temp Marlow en l'Africa Centrala dal flum Congo siadora. Là sa metta el sco chapitani d'ina nav a vapur en tschertga da Kurtz, in commerziant d'ivur beltg en il Stadi liber dal Congo da lezza giada.
L'istorgia autamain simbolica tracta implicitamain la problematica da l'imperialissem e rassissem. L'autur polonais-englais Joseph Conrad (1857–1924) fa cun quella tematicamain e stilisticamain la punt dal realissem dal 19avel tschientaner a la moderna da l'entschatta dal 20avel tschientaner. Blers recensents han er rendì attent che Conrad tematiseschia cun fin sensori psicologic numerus svilups socials e politics che duevan pir sa far valair endretg en il decurs dal 20avel tschientaner. ‹Heart of darkness› vala sco in dals pli impurtants raquints da la litteratura englaisa insumma ed ha influenzà fin oz numerus auters auturs, artists e reschissurs da films.
Il cudesch sa cumpona da quatter parts: A l'ediziun sco tala – en furma integrala – suondan l'emprim infurmaziuns davart il raquint e ses autur; las materialias tractan per l'ina l'imperialissem e las relaziuns en il Stadi liber dal Congo (1885–1908), per l'autra l'influenza dal raquint da Conrad sin la posteriuritad, e quai a l'exempel dals dus films ‹Aguirre, der Zorn Gottes› (1972) ed ‹Apocalypse Now› (1979).
La versiun preschenta dal cudesch è vegnida preparada per la stampa il fanadur 2020. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.
