Utilisader:D.Camenisch/Cudeschs/Epocas istoricas en survista/Introducziun
L'istorgia da l'umanitad cumenza en l'Africa cun l'apparientscha d'emprims utensils da crap avant ca. 2,5 milliuns onns. En il center da questa publicaziun stattan alura las emprimas culturas autas ch'èn sa sviluppadas en il Proxim Orient ed il spustament successiv dal punct da gravitaziun politic e cultural vers l'Europa. Il fatg che l'istoriografia schlargia questa vista eurocentristica adina dapli vers in'istorgia globala vegn resguardà en l'artitgel introductiv; ed ils singuls artitgels d'approfundaziun na focuseschan betg exnum sin eveniments, persunas e datas, mabain sa stentan da far resortir las caracteristicas centralas da mintga epoca.
Il cudesch cumpiglia l'emprim l'artitgel da survista ‹Istorgia da l'umanitad›, preschenta alura en otg chapitels las singulas epocas da quella e finescha cun l'artitgel ‹Istorgia› che tracta dumondas da la perscrutaziun dal passà. Ils otg artitgels ch'approfundeschan las epocas principalas èn:
- Evoluziun da l'uman
- Preistorgia
- Antica
- Temp medieval
- Temp modern tempriv
- Epoca da las revoluziuns
- 19avel tschientaner
- 20avel tschientaner
La versiun preschenta dal cudesch è vegnida preparada per la stampa l'october 2019. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs. Là è er avant maun la retscha en otg toms ‹Epocas da l'istorgia mundiala› che porscha ulteriur material d'approfundaziun davart l'istorgia da l'umanitad.