Utilisader:D.Camenisch/Cudeschs/Europa dal Sid/Introducziun

Quest cudesch purtretescha il Portugal, la Spagna, l'Italia, il stadi insular Malta ed ils stadis pitschens Andorra, Monaco, San Marino e Vatican.

En connex cun quests stadis vegn per ordinari discurrì da l'‹Europa dal Sid›, magari er da l'‹Europa dal Sidvest› u da l'‹Europa mediterrana›. Mintga denominaziun ha ses avantatgs e ses dischavantatgs, sia giustificaziun e sias flaivlezzas: Tut tenor puntg da vista fiss d'agiunscher a la glista la costa adriatica dal Balcan, la Grezia e la Cipra. La Spagna ed il Portugal pudess ins er considerar sco part da l'Europa dal Vest. E tar ils stadis pitschens Andorra, San Marino e Vatican sa tracti, per esser precis, da pajais interns che na cunfineschan gnanc cun la Mar Mediterrana.

Tut en tut giustifitgescha l'istorgia e cultura cuminaivla tuttavia da tractar la regiun che vegn preschentada en quest cudesch – a la quala fiss anc d'agiuntar la Frantscha dal Sid – sco unitad. Quella è segnada da l'ierta da l'Imperi roman occidental, da la cultura cristiana da tempra catolic-romana e da la Mar Mediterrana che vegn purtretada en in focus tematic a la fin da la publicaziun.

La versiun preschenta dal cudesch è vegnida preparada per la stampa il favrer 2018. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs. Il tom ‹Europa dal Sid› fa part d'ina retscha da cudeschs che preschenta ils singuls stadis da l'Europa (geografia, istorgia, politica e cultura).