Utilisader:D.Camenisch/Cudeschs/Finlanda – Helsinki/Introducziun
La Finlanda è in pajais da l'Europa dal Nord situà tranter la Svezia, la Norvegia, la Russia e la Mar da l'Ost. La caracteristica centrala da la cuntrada finlandaisa è sia ritgezza da lais. Pervi da quella vegn la Finlanda er numnada ‹il pajais dals milli lais›. Il finlandais è ina da las paucas linguas betg indoeuropeicas che vegnan discurridas en l'Europa. Il pievel d'origin deriva oriundamain – tenor l'opiniun tradiziunala – dal territori a l'ost da l'Ural u da la regiun dal Meander da la Volga. Sur lung temp ha il pajais furmà ina part integrala da la Svezia. Il 1809 è el alura vegnì cedì a la Russia; sut lez domini è la Finlanda plaunsieu sa furmada ad ina naziun. Il 1917 ha il pajais cuntanschì l'independenza statala.
Questa publicaziun cumpiglia l'artitgel da survista ‹Finlanda›, purtretescha la chapitala Helsinki e vegn cumplettada a la fin d'intginas chartas geograficas. L'artitgel principal porscha infurmaziuns detagliadas davart ils suandants temas:
- Geografia
- Natira
- Istorgia
- Populaziun
- Dretg
- Politica
- Furmaziun
- Economia
- Traffic
- Cultura
- Medias
- Sport
La versiun preschenta dal cudesch è vegnida preparada per la stampa il fanadur 2020. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.