Utilisader:D.Camenisch/Cudeschs/Furmas statalas/Introducziun

Il term ‹stadi› designescha l'urden politic che regia en in territori definì. El cumpiglia tant la furma da stadi constituziunala (de jure) sco er l'execuziun da la pussanza effectiva (de facto). Correspundentamain sa laschan las furmas statalas modernas eruir tenor dus criteris: ‹schef dal stadi› (republica – monarchia) resp. ‹purtader da la pussanza dal stadi› (monarchia – democrazia). Uschia po per exempel la monarchia sa manifestar en la pratica en furma absoluta, constituziunala ni parlamentara – quai che munta ina gronda differenza ord vista dals dretgs politics che cumpetan mintgamai a la singula burgaisa ed al singul burgais.

Questa publicaziun s'avischina a la tematica da las furmas statalas en trais chapitels: L'emprim cumpiglia ils trais artitgels introductivs ‹Stadi›, ‹Suveranitad› e ‹Politica› che furman la basa per las ulteriuras expectoraziuns. En il chapitel principal vegnan alura tractadas las caracteristicas generalas da las furmas statalas e preschentadas las furmas principalas ‹Monarchia›, ‹Republica›, ‹Dictatura› e ‹Democrazia›. Ed il chapitel final s'occupa da l'organisaziun interna dals stadis (‹Separaziun da las pussanzas›, ‹Stadi unitar›, ‹Federalissem›).

La versiun preschenta dal cudesch è vegnida preparada per la stampa l'avrigl 2020. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.