Utilisader:D.Camenisch/Cudeschs/Illuminissem e revoluziuns/Introducziun
Il tschientaner tranter il 1750 ed il 1850 vala sco ‹temp da sava› (Reinhart Koselleck); quel ha mess ad ir midaments fundamentals ch'han tschiffà praticamain tut ils champs dal pensar ed agir da l'uman. Il tom ‹Illuminissem e revoluziuns› focussescha sin dus da quels, numnadamain sin ils svilups spiertals e politics. Il cudesch è structurà sco suonda:
- L'artitgel introductiv ‹Epoca da las revoluziuns› tracta la dumonda co che l'istoriografia ha periodisà ils svilups dal temp e porscha ina survista concisa da quels.
- Il pli lung artitgel insumma, ‹Illuminissem›, sa fatschenta cun las premissas spiertalas da l'epoca. En discussiun vegnan mess ils effects da la nova moda da pensar sin religiun, scienza, art, societad, teoria dal stadi e politica.
- La segunda part dal cudesch è deditgada als eveniments politics centrals: ‹Revoluziun americana›, ‹Revoluziun franzosa›, ‹Guerras da coaliziun›, ‹Restauraziun›, ‹Revoluziun tudestga dal 1848/49›.
- A la fin resumescha ina ‹Tavla cronologica› ils terms impurtants dal ‹temp da sava› en furma tabellara.
Ils svilups economics (Revoluziun industriala), socials (dumonda sociala) e culturals (naziunalissem, cumbat cultural) vegnan approfundads en il tom ‹19avel tschientaner›.
La versiun preschenta dal cudesch è vegnida preparada per la stampa il favrer 2017. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs. Il tom ‹Illuminissem e revoluziuns› fa part d'ina retscha da cudeschs che preschenta las singulas epocas da l'istorgia mundiala.