Utilisader:D.Camenisch/Cudeschs/Ils tschintg senns/Introducziun

Ord Wikipedia

Tar la percepziun sa tracti da l'organisaziun, identificaziun ed interpretaziun d'infurmaziuns sensoricas. Tutta furma da percepziun sa basa sin signals che van tras il sistem da la gnerva; quels resultan da lur vart da la stimulaziun fisicala u chemica dal sistem sensoric. La vesida sa basa per exempel sin la glisch che frunta sin la retina da l'egl, l'odur vegn intermediada tras moleculs e l'udida involva undas da pressiun. La percepziun na sa restrenscha betg a la recepziun passiva da quests signals, mabain cumpiglia er lur elavuraziun tras l'individi ch'als retschaiva.

Quest cudesch preschenta ils tschintg senns en la suandanta successiun (mintgamai a basa da lur impuls): percepziun visuala (glisch), percepziun auditiva (tun), percepziun tactila (pressiun), percepziun olfactorica e gustatorica (stimulaziuns chemicas). Ils singuls artitgels focusseschan sin la biologia da l'uman, tematiseschan però er l'evoluziun dals senns e la varietad da lur furmas entaifer il reginavel dals animals. L'artitgel final sa deditgescha als tratgs communabels da tutta percepziun e mussa quant ferm che quella dependa da l'elavuraziun cognitiva dals stimuls (suppressiun, rinforzament, attenziun, memoria, experientschas, aspectativas e.a.).

La versiun preschenta dal cudesch è vegnida preparada per la stampa il zercladur 2019. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.