Utilisader:D.Camenisch/Cudeschs/L'erupziun dal Vesuv l'onn 79 s.C./Introducziun
L'onn 79 s.C. ha gì lieu in'erupziun catastrofala dal Vesuv ch'ha chaschunà in grond dumber da victimas e sepulì cumplettamain las citads da Pompei e Herculaneum. Sco perditga istorica preschenta al lieu ha Plinius il Giuven descrit pli tard quest eveniment en duas brevs drizzadas a l'istoriograf Tacitus. Questas funtaunas scrittas sco er las exchavaziuns archeologicas dal temp modern porschan in'invista profunda en la vita da mintgadi dal temp dals imperaturs. U per duvrar ils pleds da Goethe: «Igl èn capitadas bleras sventiras en il mund, ma paucas ch’avessan legrà talmain la posteriuritad».
L'emprima part dal cudesch porscha l'ediziun integrala rumantscha da las duas brevs (incl. versiun sinoptica latin/rumantsch). Alura suonda in commentari che cumpiglia artitgels ch'èn colliads directamain cun l'autur, cun l'adressat e cun il cuntegn da las brevs. La terza part, las materialias, serva a cumplettar las brevs cun las enconuschientschas archeologicas da Pompei e Herculaneum sco er a situar il temp da Plinius en il context pli vast da l'antica romana. E per finir vegn dà in sguard a l'istorgia dal Vesuv – da la preistorgia fin en il temp preschent – ed al vulcanissem en general.
La versiun preschenta dal cudesch è vegnida preparada per la stampa l'october 2017. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.