Utilisader:D.Camenisch/Cudeschs/Las religiuns mundialas/Introducziun
Il rom da quest cudesch furman ils artitgels ‹Religiun› e ‹Senn da la vita›. Quels porschan infurmaziuns generalas tant davart la religiusadad individuala sco er davart religiuns en il senn collectiv. Tematisads vegnan aspects istorics, filosofics, etics, sociologics e psicologics; en pli vegn dà in sguard a las differentas concepziuns da l'origin dal mund (cosmogonia) e da las ultimas chaussas (eschatologia).
En il center da la publicaziun stattan ils purtrets da las tschintg religiuns che vegnan consideradas en il senn classic sco ‹mundialas›. Da quellas fan part:
- Las trais religiuns da caracter monoteistic-abrahamistic (giudaissem, cristianissem ed islam). Naschidas en il Proxim Orient duevan tuttas trais influenzar en lur moda la cultura, filosofia ed istorgia da l'Occident.
- Las duas religiuns – per part bundant pli veglias – che derivan oriundamain dal Subcontinent Indic (hinduissem e budissem) e da las qualas il budissem dueva irradiar fin en l'Orient Extrem. Quellas furman la basa da la filosofia orientala che sa differenziescha en puncts essenzials dal pensar occidental.
La versiun preschenta dal cudesch è vegnida preparada per la stampa il zercladur 2018. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.