Utilisader:D.Camenisch/Cudeschs/Preistorgia/Introducziun
L'evoluziun da l'uman cumenza cun il svilup dals hominins avant ca. 5–6 milliuns onns. La preistorgia sco tala cumpiglia las epocas che tanschan dals emprims utensils da crap fin las emprimas funtaunas scrittas (temp da crap, temp da bronz e temp da fier). Per part vegn ultra da quai discurrì d'ina protoistorgia sco fasa transitorica tranter la preistorgia e l'istorgia.
En l'Europa Centrala dura il temp da crap fin 2200 a.C.; en la fasa tardiva da quel cumenza la cultivaziun dad ers. A l'epoca da transiziun vers il temp da bronz, l'uschenumnà temp d'arom, è deditgà en la publicaziun in emprim chapitel d'approfundaziun che tracta la famusa mumia da glatscher Ötzi.
Il temp da bronz cumpiglia ils tschientaners tranter 2200 a.C. e 800 a.C. Il segund chapitel per s'approfundar s'occupa da la Cultura da santeris cun urnas dal temp da bronz tardiv.
Il temp da fier (a partir da 800 a.C.) sa divida en las fasas da Hallstatt e da Latène. En l'Europa Centrala e dal Vest eran da quel temp surtut preschents ils Celts che vegnan tractads a fund en il terz chapitel approfundant.
A la fin da la publicaziun suonda in focus tematic davart l'archeologia sco scienza che perscrutescha ils relicts materials da l'istorgia da l'umanitad.
La versiun preschenta dal cudesch è vegnida preparada per la stampa l'avrigl 2020. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.