Utilisader:D.Camenisch/Cudeschs/Temp medieval/Introducziun

Ord Wikipedia
Jump to navigation Jump to search

Il temp ch'ins considerava ils tschientaners tranter 500 e 1500 s.C. sco millenni obscur è passà – oz guardan ins cun in'egliada bundant pli differenziada sin questa lunga epoca da l'istorgia europeica. Quella è bain stada segnada en emprima lingia dal cristianissem e dal feudalissem, ma ha er integrà a moda multifara influenzas d'ordaifer ed ha fullà via ad innovaziuns en tecnologia, scienza e politica.

Il tom ‹Temp medieval› or da la retscha ‹Epocas da l'istorgia mundiala› cumenza cun in chapitel introductiv e cumpiglia alura duas parts principalas: D'ina vart ils artitgels ch'approfundeschan las periodas dal temp medieval tenor la sutdivisiun classica (‹Temp medieval tempriv›, ‹Temp autmedieval› e ‹Temp medieval tardiv›); da l'autra vart ils trais artitgels ‹Imperi bizantin›, ‹Reginavel dals Francs› e ‹Sontg Imperi roman› che mussan co che l'idea imperiala da l'antica è sa transfurmada en il decurs dal temp.

A la fin da la publicaziun gidan ina tavla cronologica ed ina glista dals regents a s'orientar en il lung spazi da temp, ritg da svilups e d'eveniments multifars, che tanscha dals Merovings, Carolings ed Ottons en il temp medieval tempriv, sur ils Saliers e Staufers en il temp autmedieval fin als Habsburgais e Luxemburgais en il temp medieval tardiv.

La versiun preschenta dal cudesch è vegnida preparada per la stampa il favrer 2019. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs. Il tom ‹Temp medieval› fa part d'ina retscha da cudeschs che preschenta las singulas epocas da l'istorgia mundiala.