Utilisader:D.Camenisch/Cudeschs/Tge è l'illuminissem?/Introducziun
En la vegliadetgna da 60 onns ha il filosof Immanuel Kant publitgà l'onn 1784 ses tractat ‹Resposta a la dumonda: Tge è l'illuminissem?›, il qual dueva daventar in dals texts-clav da l'epoca. Il text è a medem temp in confess persunal, in'analisa da la situaziun sociala e politica a la fin dal 18avel tschientaner sco er in appel als docts e regents da cuntinuar sin la via enchaminada.
Quest cudesch sa cumpona da duas secziuns, numnadamain da la part editoriala e dal commentari (materialias):
- L'emprima part preschenta la translaziun integrala rumantscha dal tractat filosofic. Per pudair cumparegliar translaziun ed original vegnan las duas variantas linguisticas ultra da quai reproducidas en furma sinoptica.
- La segunda part cumpiglia texts explicativs che sa refereschan a l'essai sco tal, a la vita ed ovra da Kant en general sco er als tratgs e las caracteristicas da l'epoca da l'illuminissem insumma.
La versiun preschenta dal cudesch è vegnida preparada per la stampa il november 2015. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.