Utilisader:Mesoscaph/Cudeschs/Civilisaziuns da l'antica/Prefaziun
VICHIPEDIA JUNIOR è ina retscha da cudeschs tematics che sa drizza ad uffants da ca. 10 onns ensi (stgalim mesaun resp. 2. ciclus tenor Plan d'instrucziun 21). Ils texts derivan da Wikijunior ubain dal lexicon d'uffants Klexikon. En ina lingua bain chapibla dat la retscha invista en tematicas multifaras (natira, istorgia, geografia, uman e societad e.a.) – per a chasa u en scola, per stampar u duvrar online.
Il cudesch ‹Civilisaziuns da l'antica› tracta l'Egipta, Babilonia, Persia, Grezia, Roma e numerus auters pievels e culturas dal Vegl Orient e da l'Europa (fin la migraziun dals pievels ca. 500 s.C.). Il chapitel introductiv s'occupa da la dumonda tge che differenziescha las veglias civilisaziuns da las cuminanzas originaras dal temp da crap. Alura suonda ina survista da las singulas epocas da l'antica. La part principala dal cudesch furman sinaquai ils trais chapitels che suondan il svilup da la civilisaziun davent da ‹La mesaglina fritgaivla dal temp d'arom e da bronz› sur ‹Il Vegl Orient en l'emprim millenni a.C.› fin ‹A l'origin da la civilisaziun en l'Europa›. Per finir vegn dà in sguard als motivs daco che l'uman s'occupa insumma dal passà e preschentada la lavur dals archeologs ed istoriografs.
La versiun preschenta dal cudesch è vegnida preparada per la stampa il november 2021. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.
