Utilisader:Mesoscaph/Cudeschs/Linguas dal mund/Prefaziun
VICHIPEDIA JUNIOR è ina retscha da cudeschs tematics che sa drizza ad uffants da ca. 10 onns ensi (stgalim mesaun resp. 2. ciclus tenor Plan d'instrucziun 21). Ils texts derivan da Wikijunior ubain dal lexicon d'uffants Klexikon. En ina lingua bain chapibla dat la retscha invista en tematicas multifaras (natira, istorgia, geografia, uman e societad e.a.) – per a chasa u en scola, per stampar u duvrar online.
Quest cudesch s'occupa da la varietad da las linguas en tut il mund. En il chapitel introductiv vegnan tractadas las suandantas dumondas: Tge è quai, ina lingua? Tge n'è nagina lingua? Tgi ha atgnamain inventà las linguas? Tge è grammatica e pertge è ella impurtanta? Pertge na discurrin nus betg tuts la medema lingua? Tge linguas datti?
Alura suondan trais chapitels che preschentan mintgin diesch linguas:
- las pli impurtantas linguas mundialas (tenor lur dumber da pledaders total, pia lingua materna e lingua estra)
- autras linguas europeicas (tenor famiglias da linguas)
- ulteriuras linguas (linguas da muntada istorica – autras linguas da diversas parts dal mund – intginas linguas artifizialas e spezialas).
Ed il rumantsch? Guarda a la fin da l'introducziun...
La versiun preschenta dal cudesch è vegnida preparada per la stampa il november 2021. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.
