Utilisader:Raschladiras/Cudeschs/Autobiografia dad Otto Carisch/Introducziun

«Cun l'egliada drizzada anen» – uschia caracterisescha Otto Carisch (1789–1858) gia en las emprimas lingias l'intenziun e direcziun da si'autobiografia. I na sa tracta pia betg d'enumerar e documentar en furma d'ina pura cronica ils schabetgs ed il decurs exteriur che sia vita ha prendì; mabain da sa volver vers il mund intern, da reflectar il succedì en il context da las atgnas ponderaziuns e motivaziuns interiuras.

Quai è ina da las qualitads da las notizias autobiograficas voluminusas da Carisch – ed ina surprendenta, sch'ins ponderescha ch'el las ha scrit ils onns 1854–1858. E l'autur aveva er en auters reguards – malgrà che ses pensar reflectescha cleramain ils ideals da la burgaisia da lezza giada – in sensori attentiv che rendan ses text fin oz ordvart custaivel: ina tenuta averta, liberala, ma a medem temp autocritica; in interess ordvart viv per ils lieus, las persunas, ils eveniments ch'han segnà sia vita; e la grondezza da dar a las dunnas blers spazi, sajan quai ad enconuschentas ed amias, as sias duas consortas u – en furma d'extracts extendids or da lur brevs – a la poeta Nina Camenisch, da la quala el ha edì ina part da l'ovra (davart lur correspundenza cf. Bündner Monatsblatt 1938, p. 33–47).

Otto Carisch è naschì il 1789 a Sarn, Mantogna, ed ha passentà ina buna part da si'uffanza (la vegliadetgna tranter 15 mais e 10 onns) tar ils parents da sia mamma a Duvin, Lumnezia. A la Scola chantunala evangelica a Cuira (1806-1811) èn suandads onns da studi da teologia a l'Academia da Berna (1811-1813) ed a Berlin (1818-1819, tar Friedrich Schleiermacher). Tranteren ha el passentà segiurns per emprender franzos e talian a Losanna e sco magister privat a Bergamo.

Sinaquai è Carisch stà magister a la Scola chantunala evangelica a Cuira il 1819-1825 e danovamain il 1837-1850. Recepì en la Sinoda evangelica il 1824, ha el operà tranteren sco preditgant a Poschiavo (1825-1837). A Poschiavo ha el er emprendì a conuscher Maria Mini, cun la quala el ha gì tschintg uffants. Suenter la mort da si'emprima dunna ed il return a Cuira ha el maridà il 1839 Iduna Lenz, cun la quala el ha gì in'ulteriura figlia (cf. l'arber genealogic en QBG 4, p. 314).

Carisch è stà ordvart engaschà sco pedagog, filantrop e lexicograf. Tranter auter ha el scrit in vocabulari tudestg-talian-rumantsch (sursilvan e ladin) per las scolas ruralas e grammaticas tudestg-rumantschas per il diever en scola; medemamain è el stà translatur da la Bibla en rumantsch. Plinavant ha Carisch inizià l'Uniun evangelica da scola 1827 ed è stà president da quella ils onns 1838-1846. Ed el è stà ami ed executur testamentar da Johann Peter Hosang (dal legat dal qual è resortida la fundaziun Plankis dad oz).¹

*

Las notizias autobiograficas da Carisch han gia sveglià baud interess. Da quai dattan perditga las copias en manuscrit che vegnan conservadas en l'Archiv dal stadi dal Grischun. E betg main la lavur editoriala dal plevon, magister e publicist Benedikt Hartmann (1873–1955, cf. sia biografia en il LIR) ch'ha preschentà ils onns 1940 in emprim insatg da quellas (Aus einem entlegenen Bündner Bergdorf vor 150 Jahren. Ein bis dahin unveröffentlichter Erlebnisbericht, en: Bündnerisches Haushaltungs- und Familienbuch 1942, p. 7–13) e silsuenter ina biografia extendida che sa basa fermamain sin l'autobiografia (Professor Otto Carisch 1789–1858. Ein Bündner Zeitbild, en: Jahresbericht der Historisch-Antiquarischen Gesellschaft von Graubünden 77, 1947, p. 1–144).

Edì il text a moda integrala han alura Ursula ed Ursus Brunold-Bigler il 1993 en la retscha Quellen und Forschungen zur Bündner Geschichte, tom 4 (QBG 4) da l'Archiv dal stadi (sut il titel Rückblick auf mein Leben. Autobiographie eines Pfarrers, Schulmanns, Philanthropen und Lexikographen, 1789–1858). L'ediziun è munida cun in'introducziun che renda attent a las caracteristicas da l'autobiografia e vegn cumplettada a la fin d'in apparat detaglià che porscha infurmaziuns supplementaras davart las numerusas persunas, lieus, publicaziuns etc. che Carisch menziunescha.

Carisch è creschì si a Duin e Sarn en in ambient rumantsch, el discurra er en si'autobiografia da «nus Rumantschs» ed ha sez enritgì la lingua e litteratura rumantsch sco translatur da la Bibla e lexicograf. Si'autobiografia è però scritta per tudestg e cumpara qua per l'emprima giada en versiun rumantscha. Il text è vegnì translatà a moda integrala e s'orientescha areguard la structura (trantertitels, alineas) a l'ediziun tudestga dal 1993 (agiuntond però ils titels XV. e Finiziun). Il cuntegn è structura sco suonda:

Prefaziun
I. Famiglia e naschientscha
II. Onns d'uffanza a Duvin
III. En chasa paterna a Sarn, dal 1799 fin il 1802
IV. Segiurn a Flearda, dal november 1802 fin il matg 1806
V. Segiurn a Cuira, dal matg 1806 fin il matg 1811
VI. Segiurn a Berna, dal matg 1811 fin l'october 1813
VII. Segiurn a Losanna, da l'october 1813 fin il schaner 1814
VIII. Bergamo
IX. Svilup intern durant mia vita
X. Berlin, dal mars 1818 fin l'avust 1819
XI. Magister a la scola chantunala
XII. Poschiavo, 1825–1837
XIII. Princips ed experientschas durant mes temp d'uffizi en il Puschlav
XIV. Cuira. Scola chantunala, dal settember 1837 fin il settember 1850
XV. Operusitad suenter la sortida da la Scola chantunala, 1850–1858
Finiziun (scritta dad Iduna Carisch-Lenz)

*

La versiun preschenta dal cudesch è vegnida preparada per la stampa il settember 2024. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.

––––––––––––

¹ Infurmaziuns biograficas davart Otto Carisch tenor Benedict Hartmann: Professor Otto Carisch 1789–1858. Ein Bündner Zeitbild, en: Jahresbericht der Historisch-Antiquarischen Gesellschaft von Graubünden, tom 77, 1947, p. 1–144; Pieder Cavigelli: Mattli Conradi, Otto Carisch und Baseli Carigiet, en: Bedeutende Bündner aus fünf Jahrhunderten, tom I, p. 325–336 (Carisch p. 330–333); Ursula ed Ursus Brunold-Bigler: Rückblick auf mein Leben. Autobiographie eines Pfarrers, Schulmanns, Philanthropen und Lexikographen, 1789–1858. (Quellen und Forschungen zur Bündner Geschichte, tom 4), 1993; Erich Wenneker: Carisch, Otto, en: Biographisch-Bibliographisches Kirchenlexikon, tom 15, col. 390–392; Peter Metz: Otto Carisch, en: Lexicon Istoric Retic, 2010/2012. Cf. plinavant las ediziuns rumantschas da Carisch en la Bibliografia Retorumantscha (nrs. 1134–1143), la vasta litteratura e litteratura secundara en il catalog da la Biblioteca chantunala sco er il relasch parzial en l'Archiv dal stadi dal Grischun (t.a. il manuscrit da l'autobiografia sco er B/N 0374/a, Briefwechsel Otto Carisch, 1807–1825, Nr. 1–204).