Allegra
Ord Wikipedia
|
Quist artichel es scrit in rumantsch vallader
|
Allegra (plü d'inrar la fuorma adverbiala allegramaing) es ün salüd dals idioms vallader e puter chi vain dovrà in Engiadina dürant il temp tanter la bunura tarda e la saira tampriva. Quist salüd es singular i'l muond da las linguas. El significha cha quel, chi exprima il salüd, giavüscha a l'oter da viver in allegria. Quai voul dir cha'l salüd svess fa müdar la realtà. La scienzcha linguistica discuorra lapro d'ün fenomen "pled performativ".
Oriundamaing vaiva il salüd ün cuntgnü religius e tunaiva: "cha Dieu ( o il Segner) ans allegra".
