Radio Gherdëina Dolomites
Ord la Wikipedia
Radio Gherdëina Dolomites (per il solit numnà Radio Gherdëina (on air)) è in emettur radiofonic ch'è naschì l'onn 1979 sin basa d'in project dad Ivo Walpoth, Arno Mahlknecht ed Oswald Rifesser. Dapi lura è la direcziun savens vegnida midada. L'onn 1991 è l'emettur vegnì cumprà da la famiglia Franz Rabanser dad Urtijëi che maina fin ussa la gronda famiglia radiofonica. Radio Gherdëina Dolomites è l'unic emettur da radio commerzial en la regiun ch'emetta numerusas emissiuns - tant live sco registradas - en lingua ladina dolomitana. Uschia tegna l'emettur quint dals divers idioms da la Ladinia dolomitana, tudestga e taliana.
Ins po retschaiver l'emettur en tut il territori ladin-dolomitan (Val Gherdeina, Val Badia, Val da Fascia, Fodom, Col ed Ampezo) sco era en la Val da l'Eisack, en la Val da Puster, a Bulsaun ed en la Bassa Atesina, a Meraun e conturn, sco er sin la planira auta dal Schlern.
Radio Gherdëina Dolomites emetta da tuttas uras emissiuns da radio da divers tips ed operescha sco promotur da musica moderna e folcloristica ladina. Mintg'ura vegn emess il schurnal Südtirol Journal en collavuraziun cun l'agentura da pressa RMI da Bulsaun.
Dad ina retschertga ch'è vegnida fatga l'onn 2005 da l'ASTAT (l'institut da statistica da la provinza) resulta che Radio Gherdëina Dolomites ha be en la Provinza da Balsaun (che cumpiglia las valladas da Gherdeina e Badia) mintga di passa 13'000 auditurs e 25'000 auditurs mintg'emna.
