Autoritad da recurs independenta davart radio e televisiun AIRR

L'Autoritad independenta da recurs davart radio e televisiun AIRR (tudestg Unabhängige Beschwerdeinstanz für Radio und Fernsehen UBI; franzos Autorité indépendante d'examen des plaintes en matière de radio-télévision AIEP; talian Autorità indipendente di ricorso in materia radiotelevisiva AIRR; englais Independent Complaints Authority for Radio and Television ICA) è in'autoritad da la Confederaziun svizra, ch'è sumeglianta ad ina dretgira. Ella è affiliada administrativamain al Secretariat general dal Departament federal per ambient, traffic, energia e communicaziun DATEC e tutga tar las autoritads da regulaziun Infrastructura.

La AIRR exista dapi l'onn 1984. Il parlament ha vulì surdar la surveglianza davart ils cuntegns da programs da radio e televisiun ad in'autoritad independenta. La AIRR po daventar activa mo sin recurs e betg d'uffizi.

La Constituziun federala (art. 93 al. 5), la Lescha federala davart radio e televisiun (art. 4 fin 6 ed art. 82 fin 99), l'Ordinaziun davart radio e televisiun (art. 75 fin 77) sco er il Reglament da gestiun cuntegnan las basas per l'activitad da la AIRR.

Incumbensas

La AIRR tracta recurs cunter emissiuns redacziunalas da programs da radio e televisiun naziunals, regiunals e locals sco er cunter publicaziuns online da la Societad svizra da radio e televisiun SSR. Ella sto constatar, sche las publicaziuns contestadas violeschan il dretg naziunal ed internaziunal respectiv, sco tranter auter il cumond d'objectivitad, l'observanza dals dretgs fundamentals u la protecziun da la giuventetgna.

La AIRR sto medemamain nominar e survegliar ils servetschs da mediaziun dals emetturs privats ed er suttametter mintga onn in rapport da gestiun per mauns dal Cussegl federal.

Procedura

Avant ch'i po vegnir fatg recurs tar la AIRR, sto vegnir inoltrada ina reclamaziun tar il servetsch da mediaziun. Ils otg servetschs da mediaziun per emetturs da radio e televisiun examineschan las fatschentas ed intermedieschan tranter las parts participadas. En in rapport infurmeschan els davart ils resultats da lur scleriments. Suenter che la procedura davant il servetsch da mediaziun è terminada, poi vegnir fatg recurs tar la AIRR. Il dretg da far recurs han quellas persunas che vegnan menziunadas en la publicaziun u a las qualas i vegn sa referì en autra moda. Tgi che n'ha betg in tal connex cun la publicaziun contestada, sto avair il sustegn d'almain 20 persunas (recurs popular). Suenter che la procedura d'instrucziun è terminada, decida la AIRR en il rom d'ina tractativa da princip publica davart la chaussa da recurs. La decisiun da la AIRR po vegnir contestada cun in recurs en chaussas da dretg public tar il Tribunal federal. [1] Banca da datas da las decisiuns: https://www.ubi.admin.ch/de/entscheide/entscheide-suchen-sie-mit-suchkriterien/

Mesiras en cas da violaziun dal dretg

Sche la AIRR constatescha ina violaziun dal dretg, realisescha ella regularmain ina procedura da mesiras (art. 89 LRTV). L'emettur pertutgà sto infurmar, tge mesiras ch'el ha prendì per eliminar las mancanzas e per evitar en l'avegnir violaziuns correspundentas. Sche la AIRR è da l'avis che las mesiras sajan insuffizientas, po ella dumandar il DATEC da prender mesiras.

Cumposiziun

La AIRR consista da nov commembers en uffizi accessoric da tut las quatter regiuns linguisticas da la Svizra e d'in secretariat da trais persunas che accumpogna professiunalmain ed administrativamain las lavurs da la cumissiun.

Per la perioda d'uffizi dals onns 2020 fin 2023 ha il Cussegl federal elegì ils suandants commembers:

• Mascha Santschi Kallay, presidenta
• Catherine Müller, vicepresidenta
• Delphine Gendre
• Nadine Jürgensen
• Edy Salmina
• Reto Schlatter
• Maja Sieber
• Armon Vital
• Stéphane Werly

Anteriuras presidentas ed anteriurs presidents

• Oskar Reck
• Jörg Paul Müller
• Bernard Béguin
• Felix Auer
• Ursula Nordmann
• Denis Barrelet
• Roger Blum
• Vincent Augustin
• Mascha Santschi Kallay

Weblinks

• pagina d'internet uffiziala