Binia Feltscher-Beeli

Ord Wikipedia
Jump to navigation Jump to search

Binia Feltscher-Beeli (* 13 d'october 1978 a Cuira) è ina curladra grischunaisa da Flem.

Biografia[modifitgar | modifitgar il code]

Binia Beeli è la figlia dal anteriur sportist d'inviern Gaudenz Beeli ed ha entras ses bab gia 1989 cumenzà a curlar a Flem. Sco terz en il team da skip Mirjam Ott ha ella gudagnà argent en ils onns 2004 e 2005 sco era bronz 2006 durant ils champiunadis europeics da curlar. A partir dal 2007 ha ella furmà in agen team e pudì cuntinuar cun in'ulteriura medaglia d'argent en igl onn 2009 al champiunadi europeic da curlar. Cun 27 onns è Binia Beeli sa participada als 20avels Gieus olimpics d'inviern a Turin, Italia en igl onn 2006.[1] Là ha ella gudagnà l'emprima medaglia d'argent olimpica cun la squadra svizra ensemen cun Mirjam Ott, Valeria Spaelty, Michele Moser e Manuela Kormann.[2].

Il pli grand success fin oz eran las duas medaglias d'aur mintgamai sco skip tier il champiunadi mundial 2014 a Saint John e 2016 a Swift Current, omisdus lieus èn situads a Canada. Medemamain 2014 ha ella ultra da quai era gudagnà la medaglia d'aur als champiunadis europeics a Champéry.

Binia Beeli ha maridà Reto Feltscher da Trin e viva oz a Flem cun ils dus uffants Cla (*2010) e Mea (*2012).[3]

Referenzas[modifitgar | modifitgar il code]

  1. Biografia sin sports-reference.com
  2. Participantas da l'olimpiada d'inviern da curlar
  3. Binia Feltscher-Beeli en il Migros Magazin, fevrer 2015