Caplutta da Sontgaclau
La Caplutta da Sontgaclau è ina chaplutta en stil baroc, erigida l'onn 1708 sin ils fundaments d'ina chaplutta medievala.
Sanctuari e suletta perditga intacta dal vitget da Pugaus, ina da pliras anteriuras fracziuns da Dardin ch'èn vegnidas bandunadas enturn 1800.
Tenor la tradiziun locala saja la legendara statua da lain da S. Clau vegnida chattada en in er en la vischinanza da la chaplutta actuala, in fatg che haja animà ils abitants d'eriger in suttetg commensurà per ella. Las picturas a l'intern, realisadas da l'artist indigen Gion Giachen Rieg (1678- ca. 1731), dateschan dal 1710. La pictura, ma probablamain era la construcziun da la chaplutta, èn vegnidas finanziadas d'in Benedetg Vinzens da Dardin.
Il portic da lain avant la chaplutta, che renda al bajetg sia caracteristica extraordinaria, è vegnì construì pir enturn il 1800, pia circa dal temp ch'il vitg da Pugaus è vegnì bandunà da ses davos abitants.
L'altar extern, che sa chatta entaifer il portic, lascha supponer che la chaplutta da S. Clau a Pugaus vegniva duvrada stediamain era suenter l'abandun dal vitg. Probablamain serviva ella sco staziun per pelegrins che sa rendevan en direcziun da Trun e Mustér. Els sa servivan da l'anteriura via da colliaziun principala atras la Surselva che na passava betg en il fund da la val, mabain be paucs tschient meters sut il vitg.
L'onn 2000 è la chaplutta vegnida restaurada cun agid da la Confederaziun e dal Chantun.
Galaria
[modifitgar | modifitgar il code]-
-
-
-
-
-
Altar -
Paraid davos
