Mariano Tschuor

Ord Wikipedia
Questa pagina è scritta en sursilvan.

Mariano Tschuor (* 4 da zercladur 1958 a Zignau, Trun) ei in schurnalist svizzer.

Vita e carriera[modifitgar | modifitgar il code]

Mariano Tschuor ei naschius ils 4 da zercladur 1958 a Zignau ella vischnaunca da Trun sco vischin da Rueun (ussa Glion) e da Laax. El ha passentau si'affonza e giuventetgna a Rueun. Da 1973 tochen 1978 ha el frequentau il gimnasi della scola claustrala a Mustér. Il 1978 ha el fatg in stage ella redacziun dalla Bündner Zeitung.

Da 1978 tochen 1980 ei Tschuor staus assistent per reschia e dramaturgia cun scolaziun d'actur el Städtebundtheater a Hof en Baviera. Denter 1980 e 1982 ha el occupau ils posts parzials sco dramaturg, actur ed assistent da reschia al teater municipal da Cuira e sco animatur da teater tier la Lia Rumantscha

Dapi 1982 eis el emploiaus tier la SRG SSR: da 1982 tochen 1989 sco redactur e moderatur tier Radio e Televisiun Rumantscha; da 1989 tochen 2003 sco redactur, moderatur e producent d'emissiuns tier Schweizer Fernsehen DRS a Turitg; da 2003 tochen 2009 manader da program e cauredactur tier RTR, da 2009 tochen 2014 directur dad RTR e commember dal directori dalla SRG. Dapi october 2014 eis el collavuratur el stab dil directur general ella direcziun generala dalla SRG SSR a Berna.