Otto Carisch

Otto Carisch (* 28 da settember 1789 a Sarn; † 17 da fanadur 1858 a Fideris) è stà in impurtant plevon refurmà, professer a la Scola chantunala, filantrop, lexicograf e publicist da l’emprima mesadad dal 19avel tschientaner en il Grischun.

Vita

Otto Carisch è naschì ils 28 da settember 1789 a Sarn en la Mantogna en ina famiglia da purs, sco figl da Duff Carisch e da Catrina nata Capeder. Gia en la vegliadetgna da 15 mais al han ins manà Duvin en Lumnezia tar la famiglia da sia mamma; là ha el passentà tar tat e tatta si’uffanza fin en la vegliadetgna da 10 onns. Suenter avair visità là la scola dal vitg è el vegnì scolà suenter ses return en la Mantogna la scola privata dal plevon La Nicca a Flerden. Alura ha el frequentà ils onns 1806–1811 l’Institut teologic da la Scola chantunala evangelica a Cuira.

A partir dal 1811 ha Carisch studegià a Berna teologia e pedagogia ed è er stà engaschà sco magister privat en la famiglia dal general von Wattenwyl. Da l’october 1813 fin il schaner 1814 ha el fatg in segiurn a Losanna per emprender la lingua franzosa; e dal 1814 fin il mars 1818 è el sinaquai stà magister privat en la famiglia da commerziants engiadinaisa Frizzoni a Bergamo. Ils onns 1818-1819 ha el cuntinuà ses studi da teologia a l’Universitad da Berlin, nua che surtut las prelecziuns da Friedrich Schleiermacher al han influenzà grondamain.

Na savend betg sa decider per la professiun da plevon, ha el sa laschà engaschar a partir dal 1819 sco professer da talian, tudestg ed istorgia a la Scola chantunala a Cuira; dus onns pli tard ha el er surpiglià là l’instrucziun da pedagogia e metodica. Il 1821/22 è cumparida la dogmatica da Schleiermacher, e la lectura da quella, ha tuttina anc muventà Carisch da daventar plevon. El scriva latiers:

«Jau hai uss cumenzà a Cuira a studegiar a fund questa dogmatica, e quant na devi qua betg da pensar, nettegiar, metter en ses lieu, sche jau la vuleva unir cun quella da Reinhardt e cun mia veglia cretta ed esser al cler en mes intern davart religiun, putgà, salvament, giustificaziun, elecziun etc. En il decurs da quest studi è però er il giavisch da tuttina anc daventar plevon sa sveglià danovamain ed è madirà fin che jau hai propi decidì da far quest pass.»^[1]

Ils 22 da zercladur 1824 è Carisch vegnì recepì en la sinoda evangelica dal Grischun. Il 1825 è el vegnì elegì plevon a Poschiavo, nua ch’el è stà en uffizi fin il 1837. Là ha el maridà il 1825 Maria Mini, cun la quala el ha gì tschintg uffants: Orsola (1827–1894), David Teodoro (1828–1898), Caterina Sofia (1829–1838), Anna Maria (1831–1847), Giovanni Andrea (1834–1901).

Suenter la mort prematura da si’emprima dunna è Carisch returnà il 1837 cun ses uffants a Cuira ed ha instruì 1837–1850 durant in segund temp d’uffizi talian e religiun a la Scola chantunala. Là ha el maridà il 1839 Iduna nata Lenz, oriunda da la Turinga; cun sia segunda dunna ha el gì in’ulteriura figlia, Sophia Magdalena (1840–1843). Da quel temp è el er stà executur testamentar da ses ami Johann Peter Hosang; da quai è resortida la Fundaziun Hosang resp. Fundaziun Plankis d’ozendi. Ils onns 1836 fin 1846 ha Carisch plinavant presidià l’Uniun evangelica da scola, l’iniziant da la quala el era stà il 1827.

Gia durant ses emprim temp d’uffizi a la Scola chantunala era Carisch stà activ sco lexicograf ed aveva concepì in vocabulari tudestg-talian-rumantsch (sursilvan e ladin) per las scolas ruralas. Suenter esser sortì en la vegliadetgna da 61 onns dal servetsch da scola ha Carisch reprendì sias lavurs lexicograficas-grammaticalas davart il rumantsch e la finala translatà tranter il 1852 ed il 1855 il Nov Testament en sursilvan. Ils ultims onns da sia vita ha Carisch plinavant tgirà in’intensiva correspundenza cun la giuvna scriptura Nina Camenisch (1826–1912), medemamain oriunda da Sarn. Il 1856 ha el edì ad agen quint sias ‹Gedichte eines bünderischen Landmädchens›. La stad 1858 è Carisch mort al bogn da Fideris, nua ch’el sa trategneva per far ina cura.

Ovras

Kleine deutsch-italienisch-romanische Wörtersammlung zum Gebrauch in unsern romanischen Landschulen. Cuira 1821.
Hauptparadigmata der romanischen Conjugation und Declination. Oberländer, Engadiner und Oberhalbsteiner Romanisch. Cuira 1848.
Taschen-Wörterbuch der Rhaetoromanischen Sprache in Graubünden, besonders der Oberländer und Engadiner Dialekte. Cuira 1848.
Grammatische Formenlehre der deutschen Sprache und der rätoromanischen im Oberländer und Unterengadiner Dialekt für Romanische. Cuira 1851.

Annotaziuns

↑ Tenor l’autobiografia, chapitel XI.

Litteratura

Benedict Hartmann: Professor Otto Carisch 1789–1858. En: Jahresbericht der Historisch-Antiquarischen Gesellschaft von Graubünden, tom 77, 1947, p. 1–144.
Ursula ed Ursus Brunold-Bigler: Rückblick auf mein Leben. Autobiographie eines Pfarrers, Schulmanns, Philanthropen und Lexikographen, 1789–1858. (Quellen und Forschungen zur Bündner Geschichte, tom 4), 1993.
Erich Wenneker: Carisch, Otto, en: Biographisch-Bibliographisches Kirchenlexikon, tom 15, col. 390–392.

Colliaziuns

Otto Carisch en il Lexicon istoric retic
L’autobiografia dad Otto Carisch sin Vichisource (translaziun en rumantsch grischun).

[1] Tenor l’autobiografia, chapitel XI.

[1]