Utilisader:TranslaTeam/Cudeschs/Il filien nair/Introducziun

La novella ‹Il filien nair› è cumparida l'onn 1842. Sa basond sin veglias ditgas e faschond – en furma da raquints enramads – la punt sur las generaziuns, sviluppa Gotthelf in raquint plain cuntrasts ch'alternescha repetidamain tranter idilla rurala ed orrur. Implicitamain tracta l'autur dumondas fundamentalas dal bun e dal mal, da morala (cristiana), da culpa collectiva e da la marginalisaziun da nunconformists. Uschia n'ha il cuntegn da la novella er pers oz nagut da si'actualitad.

Jeremias Gotthelf (1797–1854) ha vivì ed operà sco plevon e scriptur en l'Emmental (chantun Berna). Si'ovra litterara steva en il servetsch d'ideas cristian-umanisticas; a medem temp èn sias descripziuns da la vita purila dal 19avel tschientaner savens segnadas d'in realissem che demascrescha tutta faussa idealisaziun.

La versiun preschenta dal cudesch è vegnida preparada per la stampa il mars 2021. Maletg da cuverta: Johann Friedrich Dietler (1804–1874). Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.