La Quotidiana
Ord la Wikipedia
La Quotidiana è la suletta gasetta quotidiana rumantscha. Ella cumpara da glindesdi enfin venderdi. La redacziun da la gasetta sa chatta a Glion. La gasetta appartegna a la gruppa da medias Südostschweiz. En La Quotidiana vegn oravant tut rapportà davart quai che curra e passa en la Svizra rumantscha ed en la politica grischuna. La politica naziunala ha pli pauca paisa e novitads internaziunalas èn plitost raras. Spezial è ch’i vegn scrit en La Quotidiana en ils tschintg idioms rumantschs (Sursilvan, Vallader, Surmiran, Puter e Sutsilvan). Vitiers vegn anc il rumantsch grischun. La Quotidiana è cumparida ils 6 da schaner 1997 per l’emprima giada. Ella ha remplazzà il Fögl Ladin (1941-1996, gasetta per l’Engiadina e la Val Müstair), la Gasetta Romontscha (1857-1996, la gasetta per la Surselva) e la Casa Paterna/La Punt (1920-1996, Sutselva/Surselva protestanta). Il dumber da l’ediziun è passa 5400 (2008). Il venderdi è era il figl uffizial da la Surselva integrà en La Quotidiana ed uschia cuntanscha l’ediziun dal venderdi passa 14’000 exemplars.
Malgrà che La Quotidiana è l'emprima gasetta surregiunala n'era ella betg abla da propi fitgar pe en l'Engiadina ed en il Surmeir. Ils blers abunents ha ella en Surselva e rapporta per quai er surproporziunalmain bler davart temas da la Surselva. In auter punct debel è che la suletta gasetta rumantscha cuntegna bunamain exclusivamain inserats tudestgs. (Er la pagina d'internet da La Quotidiana è circumdada dad ina navigaziun tudestga.)
