Auto da posta
Il Auto da Posta Svizra (tudestg: PostAuto Schweiz, franzos: CarPostal Suisse, talian: AutoPostale Svizzera) è ina societad da traffic public da la Svizra.
Istorgia
[modifitgar | modifitgar il code]- → Artitgel principal: Istorgia da la posta svizra
La Posta Svizra dad oz è vegnida fundada il prim da schaner 1849; ella ha surpiglià l’administraziun centrala dals transports da persunas sco er la consegna da spediziuns postalas e spediziuns da daners. L’emprim Auto da Posta è cursà il prim da zercladur 1906 da Berna a Detlingen. La PTT, l’interpresa antecessura da la Swisscom e da La Posta Svizra, è sa spartida en dus concerns il 1997: l’interpresa Auto da posta, ch’appartegna sco la Postfinance medemamain a la Posta svizra, ha surpiglià ils servetschs da transport public. Il 2013 è la Posta vegnida transfurmada en ina societad acziunara; ma possessura resta vinavant la Confederaziun – en la rolla d’acziunara che posseda 100 % da las aczias. Il Auto da Posta maina actualmain radund 870 lingias d’auto da posta cun bundant 2190 autos da posta. La rait da lingias ha ina lunghezza totala da 11 869 km; per onn vegnan transportads radund 141 milliuns passagiers. Las lingias vegnan manadas ubain d’Auto da posta sez cun agen persunal, ubain d’ina da las radund 150 interpresas concessiunarias cun agen persunal. Tar l’interpresa sez lavuran radund 2140 persunas (chauffeurs e persunal administrativ); tar ils concessiunaris èn quai en tut stgars 1600 chauffeurs. Per part scriva la Confederaziun ora lingias, per las qualas l’Auto da posta sto concurrer cun auters interessents. Sco ils exempels da l’Engiadin’Ota e da la regiun da Sargans mussan, èsi tuttavia er pussaivel che Auto da posta è la partida perdenta tar ina tala concurrenza. Fin il 1995 finanziava la PTT il deficit dal servetsch d’auto da posta cun agid dal gudogn da la sparta da telecommunicaziun. Dapi il 1996 han tut las interpresas da traffic public d’offrir ordavant lur servetschs als empustaders (Confederaziun e chantuns). Las offertas èn liantas, uschia che l’interpresa da traffic po far ina sperdita u in gudogn. Il 2014 ha Auto da posta gia scrit per la 16avla giada en successiun cifras nairas.