Gustave Eiffel

Alexandre Gustave Eiffel (* 15 da december 1832 sco Alexandre Gustave Bonickhausen dit Eiffel a Dijon; † 27 da december 1923 a Paris) è stà in inschigner franzos e constructur d’edifizis d’atschal. El è stà il construider da la Tur d’Eiffel a Paris.

Vita

Gustave Eiffel è naschì il 1832 a Dijon, nua ch’el ha er passentà ses onns d’uffanza e da giuventetgna. Sia mamma, Catherine Mélanie Moneuse, era vegnida a bainstanza sco dunna da fatschenta en il commerzi cun charvun.^[1] A partir dal 1850 ha el visità il Collège Sainte-Barbe a Paris.^[2] L’examen a bucca per vegnir recepì a l’École polytechnique n’ha el betg dumagnà ed uschia ha el studegià chemia a l’École Centrale des Arts et Manufactures e terminà il 1855 cun in diplom. Sinaquai è el stà engaschà intgins mais en ina fabrica da material explosiv a Châtillon-sur-Seine.

Alura ha Eiffel lavurà en divers biros da construcziun, fin ch’el ha chattà il 1856 ina plazza sco inschigner tar la Compagnie des chemins de fer de l’Ouest ch’era activa en la part occidentala da la Frantscha. Qua è el s’occupà per l’emprima giada da la construcziun da punts da viafier ed è er vegnì en contact cun l’interprendider d’atschal Charles Nepveu. Quel ha realisà ch’il giuven inschigner aveva talent ed ha fatg dad el in manager da projects en la construcziun da punts da viafier. Sin quest champ existiva da quel temp ina gronda dumonda suenter inschigners ed a medem temp era la fluctuaziun da persunal fitg gronda. Eiffel ha mussà perseveranza, diplomazia ed enconuschientscha da la natira umana, ed el ha mussà in grond talent organisatoric d’adina puspè manar ensemen ils spezialists ils pli adattads per ses projects, tranter auter l’inschigner Théophile Seyrig.

L’onn 1858 al han ins elegì sco schefinschigner per la construcziun d’ina punt da viafier da 500 meters sur la Garonne a Bordeaux. L’ovra ch’è vegnida numnada pli tard Passerelle Eiffel è vegnida averta il fanadur 1860 e vala sco si’emprima ovra per propi.^[3] Enstagl da realisar la punt sco paraid plaina, sco ch’igl era usità da quel temp, ha Eiffel dà la preferientscha en la part superiura ad ina construcziun cun armadiras da travs bundant pli leva. Quai dueva daventar l’ensaina er da sias construcziun futuras.^[4] L’incumbensa pretensiusa ch’el aveva realisà cun success è stada la basa per ses bun num en la branscha.

Sia mamma ha el incumbensà d’al procurar ina dunna «che dispona d’ina modesta facultad, ha ina figura passabla, è equilibrada e dispona d’ina tscherta modestadad areguard il stil.»^[5] Uschia ha el maridà il 1862 Marie Gaudelet (* 1845), cun la quala el ha gì trais figlias e dus figls. Suenter sia mort il 1877 ha el maridà sia cusrina Chantall Letou. Il 1866 è Eiffel sa fatg independent cun in’atgna fatschenta, la Société de constructions de Levallois-Perret a Levallois-Perret sper Paris. Il 1867 ha el survegnì l’incumbensa da construir ils viaducts da Rouzat-sur-la-Sioule e Neuvial sin la lingia da viafier Commentry-Gannat en l’Auvergne. Anc il medem onn èn suandadas emprimas lavurs per l’exposiziun mundiala.

Ils onns 1872–1874 è Eiffel stà engaschà en l’America dal Sid. Tranter auter è el stà cumpiglià en la planisaziun da las staziuns centralas da Santiago de Chile sco er da La Paz en la Bolivia. El ha construì pliras catedralas a Tacna, Arica e Chiclayo en il Peru. Enavos en l’Europa ha el construì il 1875–1877 la staziun dal vest a Budapest e la Ponte Maria Pia a Porto che Théophile Seyrig aveva planisà. Il 1880 ha el survegnì l’incumbensa da construir il viaduct da Garabit ch’ha fatg sensaziun pervi da si’autezza da 122 meters e sia furma storta e ch’è vegnì avert il 1888.^[6] Il 1879 ha el cumenzà a sviluppar in sistem da travs raffinà per la purtadira da sustegn interna da la Statua da la libertad a New York, concepida dal Franzos Frédéric-Auguste Bartholdi, ed inaugurada il 1886. Il 1881/1882 ha Eiffel en pli construì la punt da Belvárosi a Szeged en l’Ungaria.

Il Dictionnaire des Francs-Maçons Européens menziuna Eiffel sco commember da la Loge des Grand Orient de France, senza però denominar quella concretamain.^[7] Bain para oravant tut la participaziun centrala dals framassuns a la concepziun e finanziaziun da la Statua da la libertad da confermar la commembranza; damai che n’è però enconuschent ni la data da recepziun ni in num concret da la loscha, è la commembranza dispitada.

A ses pli impurtant project, la Tur d’Eiffel, è precedida ils 18 da settember 1884 in’annunzia da patenta, numnadamain concernent «ina nova metoda che lubescha da construir pilasters e pilons da metal d’ina autezza che po surpassar 300 meters». L’emprim plan da la tur aveva fatg l’architect Charles Léon Stephen Sauvestre, tenor in’idea da construcziun da Maurice Koechlin. Previsa per l’Exposiziun mundiala a Paris è la tur vegnida construida sut la direcziun dad Eiffel en be 26 mais dal 26 da schaner 1887 fin ils 31 da mars 1889. A l’entschatta n’ha la populaziun da Paris betg propi acceptà la tur; ma alura è ella avanzada svelt ad in simbol da Paris e da la Frantscha renconuschì en tut il mund.

La fin dal 1887 ha Eiffel suttascrit il contract che dueva avair las pli grondas consequenzas per sia carriera. Tenor quel aveva el da furnir 30 sclusas per il Chanal dal Panama che Ferdinand de Lesseps aveva planisà. Suenter che la Societad dal Panama ha fatg concurs il favrer 1889 è Eiffel vegnì sentenzià il 1893 da betg avair ademplì il contract (Scandal dal Panama). Pli tard è el bain vegnì reabilità; ma sia societad Eiffel & Cie. ha el surdà suenter quest’experientscha a ses collavuratur Maurice Koechlin ed è sa retratg da la fatschenta.

L’onn 1891 ha Eiffel gì da supportar in’ulteriura sconfitta e tragedia: Ils 14 da fanadur e la punt da viafier sper Münchenstein (Basel-Champagna) ch’el aveva construì il 1874/1875 dada ensemen sut il pais d’in tren da persunas surchargià, quai ch’ha manà a la pli gronda disgrazia da viafier en Svizra cun 73 morts e 171 blessads. Sco ch’han mussà las retschertgas ch’èn vegnidas fatgas silsuenter tras la Scola politecnica federala, aveva in’auazun gì schlavà avant intgins onns ils cuntraforts; ma er sbagls da construcziun han ins constatà, oravant tut cun far diever da materialias da main buna qualitad per spargnar custs.^[8]

A l’entschatta dal 20avel tschientaner ha Eiffel prestà lavur da piunier sin il champ dals chanals da vent cun far experiments ch’han servì ad intercurir la resistenza da l’aria da diversas furmas geometricas. Quai dueva tranter auter furmar in’impurtanta basa per la construcziun d’aviuns moderna.

Gustave Eiffel è mort il 1923 en la vegliadetgna da 91 onns ed è vegnì sepulì sin il santeri da Levallois-Perret en il nordvest da Paris.

Il num ‹Eiffel›

Ils antenats dad Eiffel da vart dal bab purtavan il num ‹Bonickhausen-Eiffel› resp. ‹Bonickhausen dit Eiffel›. La scripziun tudestga dal num ‹Bonickhausen› è ‹Bönickhausen›. Il perdavant il pli vegl da la famiglia Bönickhausen che sa lascha cumprovar en Frantscha è Jean René Bönickhausen ch’ha maridà il 1711 a Paris ed è mort il 1734 en la vegliadetgna da 75 onns a Saint-Valery-sur-Somme en la Picardie. En il register da mortoris è menziunà sper ses num ‹dit Eiffel›. Dad el maina la filiaziun sur Jean Pierre Henry (1715–1765) e ses sulet figl Alexandre (1757–1806) a François Alexandre Bonickhausen dit Eiffel (1795–1879), il bab dad Alexandre Gustave Eiffel.

Er en l’act da naschientscha dad Alexandre Gustave Eiffel è inscrit ‹Bonickhausen dit Eiffel›. A l’ur dal document sa chatta però la remartga ch’i saja vegnì decidì tras sentenzia giudiziala dal 1880 da tschentar il num ‹Eiffel› al lieu da ‹Bonickhausen dit Eiffel›. La scursanida dal num aveva el dumandà il 1878 tar il ministeri da giustia, argumentond detagliadamain ch’il num che tunia tudestg al portia dischavantatgs en fatgs commerzials.

Tenor retschertgas dal scriptur e biograf dad Eiffel François Poncetton e da l’anteriur directur general dals archivs franzos Charles Braibant deriva il pli vegl antenat en la lingia franzosa da la famiglia dal magister Leo Heinrich Bönickhausen ch’ha vivì la fin dal 17avel tschientaner ad Aremberg (Renania-Palatinat) e Marmagen (Rain dal Nord-Vestfalia) en la regiun da la muntogna mesauna Eifel. Ses figl Jean René Bönickhausen duai esser emigrà vers il 1710 en Frantscha ed avair surpiglià l’agiunta ‹dit Eiffel›. Cumprovada dal tuttafatg n’è questa pretensiun però betg.^[9]

Ulteriuras ovras

Galerie des Machines, Exposiziun mundiala a Paris 1867, demontà il 1909
Real Bodega de la Concha en Spagna, 1869
il far Ruhnu tuletorn sin l’insla estona Ruhnu, construì il 1875
la punt da viafier sper Münchenstein (Basel-Champagna) construida il 1874/1875, dada ensemen il 1891
la viafier dal vest a Budapest, 1874–1877
Ponte Eiffel a Viana do Castelo en il Portugal (1878), punt a giartrera sur il Rio Lima
la cupla principala dal Observatoire de Nice, construì il 1879

il viaduct da Souleuvre en Normandia, construì il 1887
il 1892 è Eiffel sa participà a la concurrenza per la construcziun da la punt da la trinitad a Son Petersburg; gudagnà la concurrenza ha in’autra firma franzosa, ma quella è s’orientada al project dad Eiffel
Palácio de Ferro, construì en Frantscha e manà a Luanda
Palacio de Hierro de Orizaba, transportà per part en nav da la Belgia en il Mexico
Casa de Ferro a Maputo
il viaduct da viafier Vecchio a Corsica
la Basílica de San Sebastián a Manila, construida dal tuttafatg d’atschal tenor plans da Gustave Eiffel
il hotel Traian ad Iași (Rumenia)
la punt da viafier sur il Pruth sper Ungheni (Moldavia)
il tetg da la staziun da Santiago de Chile
La Casa de Hierro, ad Iquitos, Amazonia/Peru
la baselgia da Santa Barbara, Santa Rosalía, Mexico
la punt pendenta sper Ste-Anne, Réunion
il viaduct sper Buis-les-Baronnies da la viafier a binaris stretgs Orange–Buis-les-Baronnies, demontada il 1953
la punt a Bouloupari, Nova Caledonia

Annotaziuns

↑ Bettina Kaps: Gustave Eiffel, en: Publik-Forum Extra, avust 2023, p. 6–9, qua p. 7.
↑ David I. Harvie: Eiffel: The Genius Who Reinvented Himself. Sutton, Stroud 2004.
↑ André Desforges (ed.), Philippe de Bercegol, Monique Canellas, Bernard Dané (red.): Histoire des maires de Bordeaux (Le Grand Journal de Bordeaux). Les Dossiers d’Aquitaine, Bordeaux 2008, p. 321].
↑ Gerhard Mehlhorn, Manfred Curbach (ed.): Handbuch Brücken: Entwerfen, Konstruieren, Berechnen, Bauen und Erhalten. 3. ed., Springer Vieweg, Wiesbaden 2014, ISBN 978-3-658-03339-2, p. 49.
↑ CItà tenor Bettina Kaps: Gustave Eiffel, en: Publik-Forum Extra, avust 2023, p. 6–9, qua p. 7.
↑ Klaus Stiglat: Brücken am Weg. Frühe Brücken aus Eisen und Beton in Deutschland und Frankreich. Ernst, Berlin 1997, ISBN 3-433-01299-7, p. 86ss.
↑ Michel Gaudart de Soulages, Hubert Lamant: Dictionnaire des Francs-Maçons Européens. Dualpha, Coulommiers 2005, p. 337.
↑ Stefan Haenni: Eiffels Schuld – Das grösste Eisenbahnunglück der Schweiz. Gmeiner Verlag, Messkirch 2023, ISBN 978-3-8392-0477-1.
↑ Archives nationales: BB/11/1473 dossier 3121x78. Online, consultà ils 23 d’october 2015.

Litteratura

François Poncetton: Eiffel: Magicien du fer. Éditions de la Tournelle, Paris 1939.
Theo Zollna: Eiffel – Zum 35. Todestag des großen Bauingenieurs. En: Deutsche Architektur, annada 8 (1959), carnet 1, p. 43s.
Charles Braibant: Histoire de la Tour Eiffel. Plon, Paris 1964.
Bertrand Lemoine: Gustave Eiffel. Hazan, Paris 1984, ISBN 2-85025-067-8.
Daniel Bermond: Gustave Eiffel. Perrin, Paris 2002, ISBN 2-262-01515-5.
Uwe Schultz: Gustave Eiffel. Der Mann, der Paris veränderte. Europäische Verlagsanstalt, Hamburg 2004, ISBN 3-434-50560-1.
David I. Harvie: Eiffel: The Genius Who Reinvented Himself. Sutton, Stroud 2004, ISBN 0-7509-3308-9.
Louis Devance: Gustave Eiffel. La construction d’une carrière d’ingénieur. Éditions Universitaires de Dijon, Dijon 2016, ISBN 978-2-36441-163-0.
Michel Carmona: Gustave Eiffel. Le maître du fer. Pluriel, Paris 2022, ISBN 978-2-8185-0680-6.

Colliaziuns

Commons: Gustave Eiffel – Collecziun da maletgs, videos e datotecas d'audio

[1] Bettina Kaps: Gustave Eiffel, en: Publik-Forum Extra, avust 2023, p. 6–9, qua p. 7.

[2] David I. Harvie: Eiffel: The Genius Who Reinvented Himself. Sutton, Stroud 2004.

[3] André Desforges (ed.), Philippe de Bercegol, Monique Canellas, Bernard Dané (red.): Histoire des maires de Bordeaux (Le Grand Journal de Bordeaux). Les Dossiers d’Aquitaine, Bordeaux 2008, p. 321].

[4] Gerhard Mehlhorn, Manfred Curbach (ed.): Handbuch Brücken: Entwerfen, Konstruieren, Berechnen, Bauen und Erhalten. 3. ed., Springer Vieweg, Wiesbaden 2014, ISBN 978-3-658-03339-2, p. 49.

[5] CItà tenor Bettina Kaps: Gustave Eiffel, en: Publik-Forum Extra, avust 2023, p. 6–9, qua p. 7.

[6] Klaus Stiglat: Brücken am Weg. Frühe Brücken aus Eisen und Beton in Deutschland und Frankreich. Ernst, Berlin 1997, ISBN 3-433-01299-7, p. 86ss.

[7] Michel Gaudart de Soulages, Hubert Lamant: Dictionnaire des Francs-Maçons Européens. Dualpha, Coulommiers 2005, p. 337.

[8] Stefan Haenni: Eiffels Schuld – Das grösste Eisenbahnunglück der Schweiz. Gmeiner Verlag, Messkirch 2023, ISBN 978-3-8392-0477-1.

[9] Archives nationales: BB/11/1473 dossier 3121x78. Online, consultà ils 23 d’october 2015.

[1]

[2]

[3]

[4]

[5]

[6]

[7]

[8]

[9]