Surcasti

Ord Wikipedia
Jump to navigation Jump to search
Write.svg Questa pagina è scritta en sursilvan.
Surcasti
Surcasti wappen.svg
Surcasti.jpg
Surcasti
Administraziun
Chantun Grischun
District Surselva
Circul Regiun Surselva
Vischnanca Suraua
Lingua(s) rumantsch (sursilvan)
Numer postal 7115
Geografia
Autezza 998 m s. m.
Surfatscha n/a km²
Coordinatas 46° 42′ N 09° 11′ O
Demografia
Populaziun 79 (2003)
Karte Gemeinde Suraua 2007.png
Pagina-web uffiziala

Surcasti ei in'anteriura vischnaunca politica svizra dil cantun Grischun. Ella appertegnava al circul Lumnezia dil district Surselva e fa oz part della regiun Surselva.

Historia[modifitgar | modifitgar il code]

Il Crap la Gneida, ina scalutta che sesanfla el sid da Surcasti, dat perdetga dalla liunga existenza dil vitg. Il crap datescha dil temps precristian. Cun ina lunghezia da siat meters ed in'altezia da quater meters s'auda il Crap la Gneida tier las pli interessantas scaluttas dil Grischun. La detga raquenta ch'il giavel hagi vuliu fierer quei crap sin la caplutta Sontga Catrina sut Tersnaus. Il crapun seigi denton setschentaus sut Surcasti cunquei ch'ina dunna hagi impediu il giavel enten sgarflar ina crusch el crap. Quella ed autras detgas oriundas da Surcasti e contuorn ha Anton Derungs rimnau ed ediu 1938 el cudischet Entuorn las ruinas de Surcasti.

Ulteriura perdetga d'ina liunga historia da populaziun dattan divers utensils ord il temps da bronz ch'ins ha cattau a Surcasti. Quels relicts sesanflan oz el Museum retic a Cuera. Era a Crestaulta sper Surin han ins anflau perdetgas ord il temps da bronz. Bein pusseivel che la culegna da Crestaulta steva en relaziun cun quella dils anteriurs avdonts entuorn Surcasti.

La historia da Surcasti duront il temps medieval giuven ei per gronda part nunenconuschenta. Dils Carolings san ins denton che la Lumnezia era ina val fetg fritgeivla che purtava ton tscheins sco la Tumliasca ed il ministeri "in Planis". Pli tard el temps medieval possedeva igl uestg da Cuera grondas parts dalla Lumnezia. L'ugadia da quei possess havevan ils baruns da Belmont, suenter lur mort ils conts da Sax-Mesauc.

La Baselgia da Sogn Luregn[modifitgar | modifitgar il code]

Vegls documents en scret dat ei cunzun en connex cun la tuor dalla baselgia da Sogn Luregn. La tuor ord il 12avel tschentaner era 1253 en possess dils signurs d'Überkastel. Da quella signaria ha Surcasti survegniu siu num. La schlatteina svanescha denton gia all'entschatta dil 15avel tschentaner, Hartwig von Überkastel ei staus il davos descendent. La tuor dil casti ei silsuenter vegnida duvrada sco tuor baselgia. Menziuns dalla baselgia da Sogn Luregn dateschan dils onns 1345, 1515 e surtut dil 1520. En quei onn ei la baselgia vegnida consecrada. Il baghetg havevan ins da gliez temps construiu en stil gotic. Ils elements barocs ch'ein aunc oz presents van anavos sin la restauraziun da 1774. Duront quella lavur han anflau ina preziusa statua da lenn da Nossadunna che sesanfla oz el museum dalla claustra da Mustér.