Baviera

Freistaat Bayern
e
Datas fundamentalas
Chapitala	Minca (München)
Surfatscha	70'551,57 km² (1.)
Abitants	12'519'312 (2.) (30 da zercladur 2008)
Spessezza	177 abitants per km² (11avel)
PNB  - Total  - Purziun dal PNB tudestg	2005 403'709 mia. € 18 %
Imni	Gott mit dir, du Land der Bayern
Debits	1'851 € per abitant (fin 2005)
Debits en total	21,24 mia. € (2004)
ISO 3166-2	DE-BY
Website	www.bayern.de
Politica
Ministerpräsident	Horst Seehofer (CSU) (dapi ils 27 d'october 2008)
Partida regenta	CSU, FDP
Dav. elecziuns	28 da settember 2008
Prox. elecziuns	2013
Represchentanza parlamentara
Vuschs en il Bundesrat:	6
Districts administrativs

La Baviera (Bayern), uffizialmain numnà Stadi liber da la Baviera (Freistaat Bayern) è in Land en il sidost da la Germania. La Baviera è il pli grond Land tudestg ed occupa la segunda plazza tenor il dumber d'abitants davos il Rain dal Nord-Vestfalia. En il sid e sidost cunfina la Baviera cun l'Austria, en il Lai Bodan cun la Svizra ed en l'ost cun la Republica Tscheca. La Baviera cunfina plinavant cun ils pajais federativs Baden-Württemberg, Hessen, Thüringen e Saxonia. La chapitala da la Baviera è la metropola Minca (München) en la Baviera Auta (Oberbayern).

Tradiziunalmain sa divida la Baviera en ils trais parts Franconia (oz ils districts administrativs Franconia Auta, Mesauna e Bassa), Svevia (district administrativ da medem num) ed Altbayern (districts administrativs Aut Palatinat, Baviera Auta e Bassa). Las regiuns istoricamain, culturalmain e linguisticamain „nunbavaraisas“, pia la Franconia e la Svevia, s'extentan dentant sur ils cunfins da la Baviera ora, en ils Länder limitrofs Thüringen e Baden-Württemberg.

Geografia

Regiuns

La Baviera sa chatta en il sid da la Germania e cumprenda:

• las Alps bavaraisas en il sid
• la regiun prealpina fin il Danubi cun ils trais lais grondas da la Baviera Auta
• las muntognas mesaunas da la Baviera orientala e
• la cuntrada a stgalims dal Giura svevais e francon (schwäbische e fränkische Alb)

Il punct il pli bass da la Baviera sa chatta sin 107 m a Kahl am Main (Franconia Bassa), il punct il pli aut è il piz da la Zugspitze (2'962 m), la pli auta muntogna da la Germania che sa chatta en il Wettersteingebirge (circul da Garmisch-Partenkirchen).

Vesair era: Glista da las muntognas en Baviera e Glista da las regiuns en Baviera

Auas

Il flum principal è il Danubi ch'entra a Passau en l'Austria. Ses pli gronds affluents en Baviera èn (dal vest):

• Iller, Lech, Isar ed En (Inn)
• Wörnitz, Altmühl, Naab e Regen

Ils emprims quatter naschan en las Alps e transportan dapli aua. L'En transporta (pervia da ses curs superiur lung) tar sia sbuccada sper Passau per il solit in pau dapli aua ch'il Danubi. Era il Lech surpassa da temp en temp il Danubi.

La pli gronda part da la Franconia vegn drenada dal Main e ses flums laterals (Regnitz e Tauber da la sanestra, e la Fränkische Saale da la dretga) vers il vest en il Rain. En il nordost da la Franconia Auta naschan ils flums laterals sanesters da l'Elba (Elbe), la Sächsische Saale e l'Eger.

Vesair era: Glista dals flums en Baviera e Glista dals lais en Baviera