DJ BoBo

Ord Wikipedia
Quist artichel es scrit in rumauntsch puter

Peter René Baumann, meglder cuntschieu scu DJ BoBo (Kölliken, 5 schner 1968), es ün chantunz, musicist, cumponist e sutunz svizzer.
El est ün dal pöchs artists da la perioda dal stil musical u.d. "Eurodance", chi eir hoz publichescha albums cun success. Per que vegn el clamo da sieus fans "King of Dance" ("raig da la musica da sot"), eir scha düraunt las ültimas periodas sun sias chanzuns influenzedas dad elemaint da musica pop e rock. DJ Bobo es pelpü cuntschieu per ün stil, chi es üna masdüra da pop e dance.

DJ BoBo düraunt ün concert da la turnea "Pirates of Dance" als 29 avrigl 2005 a Cologna

Carriera[modifitgar | modifitgar il code]

Cumanzamaint scu discjockey e prüms success[modifitgar | modifitgar il code]

Düraunt ils ans Ochaunta scuvrit Baumann sia paschiun pella musica e dal 1985 gnit ingascho scu discjockey da la Chesa da la giuventüna "Tuchlaube" in Aarau. Sieu nom d'artist "DJ Bobo" eira da quel temp sieu "Graffiti-Tag" e sieu surnom. Seguond sieu dir es il nom ün'allusiun a la figüra da comics "Bobo, il raig da l'evasiun". Già zieva ün an ragiundschet Baumann la seguonda plazza dal champiunedi svizzer da discjockey.
Ün otra sia pasciun eira la "breakdance",chi imprendet tar üna discoteca da sieu manager d'hozindi Oliver Imfeld.
Dal 1986 dvantet el discjockey professiunel da la discoteca "Don Paco" da Wohlen e traunter 1990 e 1991 da la discoteca "Hazyland" (hoz "The Loft") da Lucerna.
Düraunt quista perioda a gnit offert a DJ BoBo da prodür sieu prüm DC singul. Dal 1989 cumparit I Love You, sia prüma chanzun: la chantunza eira la svizra Sandra Studer, hozindi moderatura televisiva. Otras duos chanzun gnint our dal 1991, Ladies in the House e Let's Groove on.
Intaunt lavuraiva DJ BoBo scu "Resident DJ" illa discoteca "Oxa" da Turich, e minchataun faisaiva'l sia cumparsa in otras discos per promouver sias chanzuns. Già da quel temp eiran da la partida ils sutunzs Kurt Burger ("Curtis") e Daniel Burkart ("Dani"), chi eir hoz collavuran cun DJ BoBo, Curtis scu coreograf e Dani scu grafic e scenograf.

1992-1994: Somebody Dance With Me[modifitgar | modifitgar il code]

La chanzun seguaint, Somebody Dance With Me, gnit fatta pella prümavouta in ün stüdi da registraziun professiunel insembel cul già da quel temp renumno tecnicum dal sun Axel Breitung, chi eir hoz cullavura a scriver e prodür chanzuns. Già poch temp zieva sia preschantaziun, chi vet lö illa discoteca "Oxa" in october 1992, vet la chanzun fich success ed as deraset sün tuot la Svizra. In schner 1993 get ella aint illa 36. plazza da la parada da hits svizra ed a la fin finela ragiundschet la prüma plazza als 14 marz 1993. Las appariziuns s'augmantettan viepü in otras discotecas da la Svizra: a que pigliaivan part DJ BoBo, Curtis, Dani ed Emel Aykanat, chi chantaiva il töch.
La firma da discs tudas-cha "EAMS" purtet la chanzun eir in Germania, inua ch'ella entret aint illa 32. plazza da la parada da hits als 8 gün 1993. L'interess davart DJ BoBo s'augmentet, uschè ch'el eira adüna darcho sün revistas scu "Thema" u "Bravo".
In sted 1993 purtet la firma da discs dal chantunz americaun Rockwell plaunt cunter DJ BoBo, perque cha'l ritornel da Somebody Dance With Me füss ün plagiat da la chanzun Somebody's Watching Me. Els as perinclettan cun üna cunvegna extragüdiziela.
In utuon 1993 gnit l'album Dance With Me sül marcho; el gnit prodüt in collavuraziun cun Axel Breitung zieva var 200 uras da lavur, ed eir Gutze Gauschi e Mark Wiss da la firma da discs "Fresh Music" pigliettan part a la producziun. In quist disc daiva que otras chanzuns renumnedas scu Keep on Dancing!, Take Control ed Everybody, chi vet fich success in sted 1994.
DJ BoBo partecipet a la turnea lameda "Mega Dance Festival" insembel cun oters artists da la musica "Eurodance" scu Haddaway e Culture Beat, cul quel get tres tuot la Germania. Düraunt quists concerts cugnuschet el Nancy Rentzsch, sia duonna d'hozindi, chi faiva la chantunza tar Haddaway ed ultra da que cullavuraiva cul proget musical 3-o-matic.

1994-1996:There Is a Party e Just for You[modifitgar | modifitgar il code]

Già in utuon 1994 gnit il seguond album da DJ BoBo publicho; aint el, clamo There Is a Party daiva que chanzun chi vettan fich success scu Let the Dream Come True, Love Is All Around, There Is a Party e Freedom.
In utuon 1995 fet el üna turnea tres tuot l'Europa cun sieu prüm egen spectacul e sunet in selas cun 2000-4000 plazzas. Al cumanzamaint dals concerts sunaiva la grüppa americauna Backstreet Boys, chi da quel temp eira auncha incuntschainta dal tuot.
Quasi a listess temp da la turnea gnit lil terz album Just for You sül marcho. Dasper nouvs arrandschamaints da las chanzuns veglias daiva que eir sieu prüm töch musica pop, clamo Love Is the Price, preschanto als 14 schner 1996 düraunt il programm televisiv "Wetten, dass...?".
In settember 1996 sunet DJ BoBo aunz ils concerts da l'"HIStory Tour" da Michael Jackson in Prag, Budapest, Bucaresta, Moscau e Varsovia, als quels pigliettan part fin 150.000 spectatuors.

1996-1997: World In Motion[modifitgar | modifitgar il code]

In october 1996 gnit il quart album da DJ BoBo World In Motion publicho. El cuntgnaiva chanzuns scu Pray, Respect Yourself, It'My Life e Shadows of the Night, registro insembel cul Vienna Symphonic Orchestra Project. Da quist discA gnittan vendieus 300.000 exemplers cun üna cuverta tridimensiunela fatta dal fotograf da Cologna Igor Tillmann aint il Museum egipziaun da Berlin.
Sün basa da differenzas persunelas aunz la publicaziun da quist album as separet DJ BoBo da la firma da discs "Fresh Music" e fundet la "Yes Music". Daspö pruvettan Gutze Gautschi e Mark Wyss da dir mel dad el davart sia carriera e sieu success (reediziun da Dance With Me e publicaziun dal cudesch Die vergessenen Jahre).
La turnea "World In Motion" cumanzet in utuon 1996 cun quatter camiuns, ün'equipa da 50 persunas e darchö üna grüppa americauna da quel temp aunca incuntschainta: ils 'N Sync da Justin Timberlake. La prüma plazza in Svizra da quista turnea füt il stadion da halla da Turich-Oerlikon; daspö'l concert da la grüppa svizra hardrock Krokus dal 1982 nu es üngün musicist svizzer pü sto bun da l'implir dal tuot. Percunter füt DJ BoBo bun als 20 october 1983, e daspö quel di dvantet quel stadion da halla lö d'almain ün concert da mincha sia turnea.

1998-1999: Magic[modifitgar | modifitgar il code]

Il tschinchevel album Magic gnit our in april 1998 e cuntgnaiva las chanzuns Where Is Your Love ed Around the World. La turnea clameda "Magic" cumanzet in utuon 1998: la scenaria eira fatta scu ün vih, e'l palc lung 15 meters mnaiva aint il public.
In utuon 1998 gnit our il DC Magic-Tour Edition, cun la nouva chanzun Celebrate. In marz 1999 publichet DJ Bobo l'album www.djbobo.ch - The Ultimate Megamix '99, chi cuntgnaiva 20 chanzuns liedas insembel.
La turnea "Magic" vet lö a l'aviert in tschinch cited in gün 1999.

1999-2000: Level 6 e Mystasia[modifitgar | modifitgar il code]

Il sesevel album da DJ BoBo, Level 6, gnit sül marcho in october 1999 e vuntgnaiva las chanzuns Together e Lies (in stil pop). Pella prüma vouta cullavurettan eir oters producturs da musica insembel cun DJ BoBo: ils töchs Last Days of 1999, Best of My Lyfe e Nightfly gnittan registro in Göteborg insembel cun Jonas Berggren da la gruppa svedaisa Ace of Base. La firma da discs giavüschaiva, cha Nightfly füss la prüma chanzun tratta our da Level 6, ma DJ BoBo det sieu veto. Impè da que gnit Nightfly dafatta tratta davent da la glista finela da l'album e publicheda be dal 2002 i'l disc speciel da l'album Celebration.
La turnea "Mystasia" cumanzet in dicember 1999 e cuntgnaiva tschinch diversas scenarias.

2001: Planet Colors[modifitgar | modifitgar il code]

La preparaziun da quist disc cumanzet già in marz 2000, cur ch'ün dumandaiva als fans da sieu website, che chanzun renumneda dals ans Ochaunta dess el metter aint i'l nouv album. La chanzun tschernida füt What a Feeling da Irene Cara dal 1983. Ella gnit preschanteda düraunt il program televisiv "Wetten, dass...?" insembel cun listessa chantunza americauna.
L'album Planet Colors gnit publicho in favrer 2001, e dasper What a Feeling cuntgnaiva eir Hard to Say I'm Sorry e Colors of Life.
La turnea "Planet Colors" mnet DJ BoBo darcho cun quatter diversas scenarias i'ls stadion da halla ils pü grands da Germania e Svizra. Aunz ils concerts chantaivan eir ils No Angels e Marque.

2002: Celebration[modifitgar | modifitgar il code]

Siand cha la carriera da DJ BoBo cumanzet dal 1992, dal 2002 eira il mumaint gnieu per festager il deschevel anniversari sülla scena. In l'album Celebration dasper la chanzun cun listess nom (nouva versiun da la chanzun da la gruppa Kool & The Gang dal 1980) daiva que chanzuns da DJ BoBo interpretedas darcho per part da chantunzs giasts scu Melanie Thornton, Gölä, Emilia ed ATC. Ün pêr chanzuns scu per exaimpel Somebody Dance With Me e Pray gnittan publichedas in "versiun 2002".
Il spectacul Celebration vet cumanzamaint in avrigl 2002 a l'Arena da Oberhausen in Germania. Il spectacul, al quêl bgers chantunzs gnittan invidos, füt unic, ed üngüna turnea nu seguit ad el.
Il seguond concert dal 2002 vet lö ad Ulaanbaatar in Mongolia, inua cha DJ BoBo füt il prüm artist occidentel a fer ün concert i'l stadion centrel da la cited; el chantet davaunt millis da spectatuors. Schabain cha DJ BoBo nu vess mê publicho lo sieus discs, rivet sia musica eir in Mongolia grazcha als "bootlegs".

2002-2004: Chihuahua e Vision[modifitgar | modifitgar il code]

Improntas dals mauns da DJ BoBo i'l "Olympiapark" da Minca

in sted 2002 zieva dumanda da la "Coca Cola Spagna" gnit la chanzun da stil mambo Chihuahua druveda scu musica da fuonz per ün spot da reclama da la renumneda bavranda. Seguond las cundiziun da Coca Cola stuaiva quista chanzun gnir prodütta in desch dis, e zieva gnir tramissa in Spagna in format mp3. Lo ho Coca Cola do la chanzun a tuot las radios sainz'oters avis, e poch zieva dvantet ella la pü vendida in Spagna e Mexico.
Düraunt cha Chihuahua vaiva success in quels stedis, preparaiva DJ BoBo sieu nouv album Visions. Al cumanzamaint da schner 2003 gnit il disc sül marcho: el cuntgnaiva las chanzuns I Believe, Let's Come Together (We Are Family) ed eir l'imna uffiziela dal champiunedi mondiel da ski alpin, chi vettan lö dal 2003 a San Murezzan.
La turnea "Visions" cumanzet in meg 2003, e trais differentas scenarias gnivan druvedas (tempel aztec, muond da film da disegns e "western saloon" dal futur). Novited da quista turnea eira la presenzcha d'üna gruppa da vairs instrumaints (battaria, percussiuns, orgel electric, ghitarra e bass), chi sunaiva directamaing la megldra part da las chanzuns; scu fin alura chantaiva la vusch feminina in playback, percunter chantaivan DJ BoBo e Tone cun lur vusch già daspö fin ans Nonaunta.
La seguonda chanzun tratta our da Vision füt Chihuahua, chi in quist möd gnit publicheda eir in Svizra; ella gnit aint illa parada da hits a la prüma plazza e dvantet la chanzun da la sted 2003. Eir in Frauntscha gnit Chihuahua druveda scu musica da fuonz dal spot da reclama da Coca Cola e dvantet medemmaing la chanzun da la sted 2003, vendind 750.000 discs e restand ündesch eivnas illa prüma plazza da la parada da hits. Ella vet success eir in Italia e Tschekia, inua ch'ella ragiundschet la seguonda plazza in amenduos ils stedis. In utuon 2003 rivet la chanzun eir in Granda Bretagna e Irlanda, inua ch'ella ragiundschet la 36. resp. 11. plazza. Impü gnit Chihuahua publicheda in Australia e Giapun. Scu reacziun pervi dal grand success publichet DJ BoBo in Svizra ün "techno-remix" da Chihuahua ed eir ün DC cun listess nom, chi cuntgnaiva sieus pü grands success da sted.
In utuon 2003 preschantet DJ BoBo ün dc speciel clamo Live in Concert, sieu prüm album "live".
Dal 2004 as retret DJ BoBo per lavurer a sieu nouv program.

2005: Pirates of Dance[modifitgar | modifitgar il code]

Già a fin november 2004 preschantet DJ BoBo sias nouvas chanzuns e sieu nouv palc ad Engelberg; siand cha'l tema da la turnea eira ils pirats, eira il palc simila ad üna barcha da pirats cun quatter scenarias pussiblas: que eira lung 32 meters e larg 10 e giaiva immez il public. L'album Pirates of Dance gnit our in favrer 2005 e cuntgnaiva la chanzun cun listess nom dal disc ed eir Amazing Life.
La turnea "Pirate of Dance" cumanzet in avrigl 2005 e get tres Svizra, Germania, Pologna e Frauntscha,inua cha DJ BoBo fet tschinch concerts al "Disneyland Resort" da Paris. Aunz sieus concerts daiva que la chantunza Nicole da Silva e'ls Virus Incorporation, chi pigliivan eir part al spectacul scu gruppa acrobatica.

2006: Greatest Hits[modifitgar | modifitgar il code]

Schabain cha DJ BoBo vess già publichos DCs da nouvs arranschamaints ed ün album per sieu deschevel anniversari da carriera, decidet el da fer gnir our sieu Greatest Hits (nempe "Ils success ils pü grands") in favrer 2006. La prüma chanzun publicheda da quist album füt Secrets of Love, chanteda insembel cun Sandra, chi eira già steda giast in favrer 2006 da l'ultim concert da la turnea "Pirates of Love".
Scu evenimaint speciel organiset DJ BoBo ün spectacul clamo "Greatest Hits" ad Engelberg als 1. avuost 2006 (di da la Festa naziunela svizra). Ils bigliets pel concert gnivan vendieus insembel cul DC Greatest Hits: per que gnit il spectacul declaro eir scu "concert d'ingrazchamaint". Aunz gnit ruvo il public da gnir al concert culs vstieus cotschens illa part superiura, perque cha'l palc consistaiva in üna granda crusch alva: ün pudaiva fer in quist möd una granda bindera svizra.

2007: Eurovision Song Contest[modifitgar | modifitgar il code]

DJ BoBo düraunt l'"Eurovision Song Contest" 2007

In occasiun d'üna cumparsa televisiva la mited da l'october 2006 exprimet DJ BoBo l'intenziun da rapreschanter la Svizra a l'"Eurovision Song Contest" 2007 (concurrenza europeana da chanzuns) da Helsinki,scha'l pievel svizzer vess gugent da que. Las votaziuns süls websites da las giazettas ed a la radio füttan fich positivas, e DJ BoBo inoltret üna chanzun a la giuria da la concurrenza.
La mited dal dicember 2006 decidet la giuria, cha DJ BoBo pudaiva piglier part a l'"Eurovision Song Contest" 2007 scu rapreschantant da la Svizra culla chanzun Vampires Are Alive. Ella gnit publicheda als 9 marz 2007 in Svizra ed als 20 avrigl 2007 in tuotta Europa, ma gnit boicotteda da qualche staziun da radio svizra[1]: l'Allianza evangelica dumandet üna modificaziun dal text resp. la retratta da la contribuziun, perque cha la chanzun rapreschainta "ün prievel pels giuvenils in prievel da suicid". Üna petiziun da cristiauns inquiets e da l'Uniun democratica federela vulaiva fer retrer la chanzun: in tuot gnittan 49.083 signaturas ramassedas; impü gnit il Cussagl federel svizzer appello per chürer la pêsch publica[2][3]. Melgrô tuot rivet la chanzun a la 3. plazza da la parada da hits ufficiela svizra als 25 marz 2007[4]. In sia resposta a la petiziun rinviet il Cussagl federel a la liberted d'opiniun, a l'autonomia da la giuria da la Televisiun svizra, chi vaiva seleziuno la chanzun, ed a la liberted da las ouvras d'art: per que nu pudaiva la chanzun gnir retratta[5].
Adonta da gandas aspettativas (üna giuria inglesa al vaiva miss a la seguonda plazza) rivet DJ BoBo be al mezfinel da l'"Eurovision Song Contest", inua ch'el as classifichet scu vainchevel[6]. DJ BoBo s'exprimet per müder il reglamaint da la concurrenza[7].

2008: Vampires[modifitgar | modifitgar il code]

L'album Vampires gnit our als 11 meg 2007 e cuntgnaiva las chanzunzs Vampires Are Alive, We Gotta Hold on e Because of You.
Già la fin november 2007 fet DJ BoBo ün concert in Germania a l'"Europa-Park" da Rust, ed a fin avrigl 2008 cumanzet la turnea "Vampires Are Alive". Al cumanzamaint dals concerts do que la gruppa Room2012 e minchataunt eir ils Magic Artists. La prüma part da la turnea glivret als 29 meg 2008 ad Erfurt pervi dal Champiunedi europeaun da ballapè. La seguonda part cumanzet als 6 settember 2008 a Genevra. Traunter 25 october e 2 november 2008 cumparit DJ BoBo düraunt l'"Halloween Festival" culs purtrets pü importants da sia turnea a l'"Europa-Park". L'ultim concert da la turnea "Vampires Are Alive" vet lö al cumanzamaint da november 2008 a Berna, inua ch'a gnittan festagedas l'inauguraziun da la "PostFinance-Arena" e la fin dals concerts. Per quista turnea gnittan pü cu 150.000 bigliets vendieus.
In avrigl 2008 gnit la chanzun Olé Olé publicheda, chi faiva part da l'album Olé Olé - The Party. Quista chanzun, chi nu vaiva ün videoclip, ragiundschet la 12. plazza da la parada da hits svizra e la 58. da quella tudas-cha.

2010: Fantasy[modifitgar | modifitgar il code]

La fin da favrer 2010 gnit l'album Fantasy publicho, dal quêl gnit tratta our la chanzun Superstar scu unic DC singul. Da quel temp a Speyer, Lipsia, Berlin, Hamburg e Turich vettan lö eir "concerts secrets", duraunt ils quêls DJ BoBo e sia gruppa preschantettan il disc Fantasy davaunt pochas persunas; in marz det que simils concerts a Sankt Anton am Arlberg e Minca.
Da sted 2010 get DJ BoBo tres Germania e Svizra cun sieu 12evel spectacul, numno "Fantasy", antecipo als 27 e 28 november 2009 a l'"Europa-Park" da Rust, inua cha'l videoclip da Superstar gnit filmo. Immez il palc, larg 14,5 meters ed ot 12,5 meters, as chattaiva üna gigantesca statua da Buddha cun ses braschs[8]. Pella prüma vouta daive que üna chantadura dal viv sül palc, Jane Bogaert.

Vita priveda[modifitgar | modifitgar il code]

Peter René Baumann creschit a Kölliken be cun sia mama, perque cha sieu bap turnet in Italia - sia patria - aunz sia naschentscha. Traunter oter füt il ballapè sia paschiun d'infanzia e giuventüna, ed el giuvet eir scu chapitauni. Scu guardgiaplazza dal FC Kölliken guadagnet el sieus prüms raps, chi spendaiva per ir a discotecas u per sieu mofa. Dal 1984 as decidet a fer ün giarsunedi scu furner e pastizier, ch'el glivret cun success.
DJ BoBo s'inscuntret persunelmaing cun sieu bap be dal 2001; daspö haune regulermaings contacts.
DJ BoBo viva i'l Chantun Lucerna insembel cun sia seguonda duonna Nancy, chi düraunt ils auns Nonaunta faiva la chantunza dal proget da musica 3-o-matic. Insembel haune duos figls.
Daspö october 2006 è'l ambaschadur naziunel dal Program alimentar mundiel da l'Organisaziun da las Naziuns unidas, ed in connex cun quist proget la mited dal marz 2007 fet el sieu prüm viedi in Etiopia, ed in october 2009 get el in Kenya.

Premis[modifitgar | modifitgar il code]

Sün tuot il muond ho DJ BoBo obtgnieu pü cu 260 discs da platin, ho contabiliso 31 chanzuns chi sun entredas illa parada da hits e gnit premio desch voutas cul "World Music Award" ("Premi mundiel da musica") scu artist svizzer chi ho vendieu pü discs i'l muond.
Pustüt la mited dals ans Nonaunta vaindschet DJ BoBo püssas voutas il premi "Bravo Otto" traunter oter scu "Meglder chantunz", "Meglder spectacul" e dal 2002 surtuot l'"Ehren-Otto" ("Otto d'onur") scu prüm artist[9].
Dal 2006 guadagnet el il disc da diamant per avair vendieu ün milliun discs in Svizra. In tuot ho'l vendieu pü cu 14 millions discs sün tuot il muond.

Spectaculs[modifitgar | modifitgar il code]

Las turneas da DJ BoBo vegnan creedas cun bgera lavur: pella planaziun fo que dabsögn da var ün an; ellas haun adüna lö mincha duos ans.
Daspö la turnea "Visions" dal 2003 suna dal viv üna gruppa da musica dasper DJ BoBo. Actuelmaing as cumpuon'la da Alex Vesper (battaria), Andreas Sigrist (ghitarra), Pierangelo Crescenzio (bass) e Thomas J. Gyger (keyboard); da pü bod eiran commembers Phil Dankner (keyboard), Zlatko Perica (ghitarra) e Hilko Schomerus (percussiuns). Impü chantaiva dal viv sül palc air Anthony "Tone" Moriah; zieva sia mort (2009) gnit el rimplazzo da Jane Bogaert, chi vaiva già piglio part a qualche concert.

Discs[modifitgar | modifitgar il code]

Chanzuns[modifitgar | modifitgar il code]

An Titul Plazza illa parada da hits[10]
Svizra Germania Austria GB
1989 I Love You
-
1990 Ladies in the House
-
1991 Let's Groove On
Dance With Me
1992 Somebody Dance With Me
Dance With Me
1
(1 eivna)
4 3
1993 Keep On Dancing
Dance With Me
2 5 7
1994 Take Control
Dance With Me
4 12 9
1994 Everybody
Dance With Me
3 2 24 47
1994 Let the Dream Come True
There Is a Party
1
(2 eivnas)
4 6
1995 Love Is All Around
There Is a Party
16 10 13 49
1995 There Is a Party
There Is a Party
13 17 29
1995 Freedom
There Is a Party
4 8 7
1996 Love Is the Price
Just for You
11 11 13
1996 Pray
World in Motion
2 3 6
1997 Respect Yourself
World in Motion
16 31 23
1997 It's My Life
World in Motion
7 16 16
1997 Shadows of the Night (cun Vienna Symphonic Orchestra Project)
World in Motion
7 23 25
1998 Where Is Your Love
Magic
3 21 20
1998 Around the World
Magic
23 55
1998 Celebrate
Magic
8 48
1999 Together
Level 6
4 26 34
1999 Lies
Level 6
48 73
2001 What a Feeling (cun Irene Cara)
Planet Colors
2 3 11
2001 Hard to Say I'm Sorry
Planet Colors
25 60
2001 Way to Your Heart
Planet Colors
2001 Colors of Life
Planet Colors
37 75
2002 Celebration
CelebrAustriaion
14 29 48
2002 I Believe
Visions
13 18 61
2002 Chihuahua
Visions
1
(10 eivnas)
19 48 36
2003 One Vision One World
Visions
2005 Pirates of Dance
PirAustriaes of Dance
3 16 43
2005 Amazing Life
PirAustriaes of Dance
27 48
2006 Secrets of Love (cun Sandra)
GreAustriaest Hits
5 11 39
2007 Vampires Are Alive
Vampires
3 24 62
2007 We Gotta Hold On
Vampires
24
2007 Because of You
Vampires
47
2008 Olé Olé
Olé Olé - The Party
12 58
2010 Superstar
Fantasy
14 41 72

Albums[modifitgar | modifitgar il code]

An Titul Plazza illa parada da hits[10]
Svizra Germania Austria
1993 Dance With Me 4 18 16
1994 There Is a Party 4 9 17
1995 Just for You 5 25 26
1996 World in Motion 1
(3 eivnas)
3 2
1998 Magic 1
(4 eivnas)
5 8
1999 The Ultimate Megamix '99 2 20
1999 Level 6 1
(4 eivnas)
11 24
2001 Planet Colors 2 4 27
2002 Celebration 2 4 18
2003 Visions 3 11
2003 Chihuahua - The Album 1
(1 eivna)
2003 Live in Concert 28 36
2005 Pirates of Dance 1
(2 eivnas)
13
2006 Greatest Hits 1
(1 eivna)
11 58
2007 Vampires 2 15 74
2008 Olé Olé - The Party 11 85
2010 Fantasy 2 10 43

Videos e DVD[modifitgar | modifitgar il code]

  • Das Live Video (1994)
  • Live on Stage (1995)
  • World in Motion (1997)
  • Magic - The Show (1998)
  • Mystasia (1999)
  • The Videos & Making of (2000)
  • Planet Colors - The Show(2001)
  • Celebration - The 10th Anniversary Show (2002)
  • Visions - Live in Concert (2003)
  • Remember Hazyland (2003)
  • Pirates of Dance - The Show (2005)
  • Greatest Hits (2006)
  • Vampires Alive - Making the Show (2008)
  • Vampires Alive - The Show (2008)
  • Fantasy - Making the Show (2010)
  • Fantasy - The Show (2010)
Publichos culla propia chesa editura
  • Specials Volume 1 (2006)
  • The Videos & Making of Part 2 (2006)

Cudeschs[modifitgar | modifitgar il code]

  • DJ BoBo - Gestatten, René Baumann (2000, biografia uffiziela)
  • DJ BoBo - Die vergessenen Jahre (publicho dals producents dal prüm album)
  • DJ BoBo - Der Star mit der Mega-Power
  • DJ BoBo - Magic Moments ("EarBook" cun 4 DC/DVD)

Films e spectaculs televisivs[modifitgar | modifitgar il code]

  • Handyman (Svizra, 2006): DJ BoBo as preschainta pel casting da "Be a Star" scu "René Baumann da l'Argovia" e chaunta sia chanzun There Is a Party. Tuottüna vegn el refüso
  • In Beverly Hills Chihuahua fet DJ BoBo sieu debüt illa sincronisaziun da films. Illa versiun tudas-cha det el sia vusch al chihuahua Montezuma
  • Da sted 2009 preschainta DJ BoBo sieu spectacul televisiv "Germany's Next Showstars" sün Pro7. Illa giuria dasper DJ BoBo do que eir Verona Pooth ed Elton. A vegn chanteda la chanzun Take Me to the Top da DJ BoBo al cumanzamaint dal program

Varias[modifitgar | modifitgar il code]

Illa part svizra dal "Miniatur-Wunderland" da Hamburg gnit ün concert da la turnea "Vampires Are Alive" fat in pitschnas proporziuns[11].

Funtaunas[modifitgar | modifitgar il code]

  1. https://web.archive.org/web/20070306065936/http://www.blick.ch/sonntagsblick/sounds/artikel57340
  2. SF-Tagesschau: 28'000 Unterschriften gegen DJ Bobo - 21 marz 2007
  3. https://web.archive.org/web/20070309132243/http://www.netzeitung.de/entertainment/music/574391.html
  4. http://hitparade.ch/showitem.asp?interpret=DJ+Bobo&titel=Vampires+Are+Alive&cat=s
  5. 20 Minuten: Leuenberger: BoBo darf weiter Vampir sein - 7 meg 2007
  6. Resultats dal mezfinel da l'Eurovision Song Contest 2007 in eurovision.de
  7. Stern: DJ Bobo nach Grandprix aus – Die türkische Flagge hätte gereicht - 11 meg 2007
  8. Die neue Show heisst «Fantasy», Neue Luzerner Zeitung, 19 gün 2009
  9. http://www.bravo-archiv.de/auswahl.php?link=ottosieger.php
  10. 10,0 10,1 Funtaunas: Svizra Germania Austria GB
  11. http://www.miniatur-wunderland.de/anlage/abschnitte/schweiz/highlights/open-air-konzert-dj-bobo/

Colliaziuns[modifitgar | modifitgar il code]

Commons
Commons
Commons: DJ Bobo – Collecziun da maletgs, videos e datotecas d'audio