Tuatschin
| Sursilvan | Tuatschin e medelin | |
| Sutsilvan | Surmiran | (Bargunsegner) |
| Vallader | Jauer | Puter |
Il tuatschin è in dialect rumantsch che vegn discurrì en la part superiura da la Surselva, numnadamain en las vischnancas da Tujetsch e Val Medel (medelin).
Tratgs caracteristics
[modifitgar | modifitgar il code]Il dialect tuatschin furma – ensemen cun il dialect da la Val Medel, il medelin – ina varianta dal sursilvan vegl. El mussa caracteristicas dals dialects dal Grischun Central e da l’Engiadina ch’èn idas a perder en il sursilvan nov che vegn discurrì en il rest da la Surselva. Il tuatschin para d’esser stà immun envers midadas linguisticas dal 15avel e dal 18avel tschientaner ch’han allontanà il sursilvan dals auters dialects grischuns. Malgrà la distanza geografica furman il tuatschin ed il medelin la colliaziun linguistica tranter il sursilvan ed il Grischun Central.
| Sursilvan | Medelin | Tuatschin | Sutsilvan | Surmiran |
|---|---|---|---|---|
| casa | tgasa | tgesa | tgea (tgeasa) | tgesa (tga) |
| di | de | de | gi | de |
| nuot | nut | nuet | nut | navot |
L’accentuaziun spezialmain marcanta dals diftongs collia il tuatschin schizunt cun l’idiom ladin vallader e cun il jauer, il dialect da la Val Müstair (entant ch’il puter enconuscha ina endirida dals diftongs resp. monoftongaziun sumeglianta al sursilvan).
In’ulteriura cunfinaziun vers il sursilvan furma la ferma tendenza da palatalisaziun dal tuatschin (p.ex. casa > tgasa/tgesa).
Utilisaziun
[modifitgar | modifitgar il code]Tar il tuatschin sa tracti d’in dialect che vegn discurrì en il mintgadi. Lingua scritta e da scola en ses territori da derasaziun furma percunter il sursilvan standardisà.
Scripturs tuatschins
[modifitgar | modifitgar il code]- Pascal Gamboni (* 1977), chantautur che scriva ses texts en tuatschin
- Laura Loretz (* 1987) scriva istorgias curtas en tuatschin